भांगरभूंय | प्रतिनिधी
नवी दिल्ली, खबरां संस्था: देशांत म्हारगाय उणे जावपाचे संकेत आसात. फेब्रुवारींत रिटेल म्हारगाय दर जानेवारीचे उणो जावपाक शकतात. सगल्या श्रेणींतल्यो वस्तू, तातूंतय खावपाच्या जिन्नसांचें दर देंविल्ल्यान ते ४ टक्के वा ताचे परस उणे जावपाक शकतात. ते रिझर्व्ह बँकेच्या उद्दीश्टांच्या भितर आसात. तशें जाल्यार आरबीआयची पतधोरण समिती एप्रिलांत परत रेपो दर देवोवपाक शकता.
जानेवारींत रिटेल म्हारगाय दर ४.३२ टक्के आशिल्लो. सांख्यिकी मंत्रालय फेब्रुवारीची आकडेवारी बुधवारा जाहीर करतलें. रिझर्व्ह बँकेन ३१ मार्चाक सोंपपी अर्थीक वर्स २०२४-२५त रिटेल म्हारगाय दर ४.८ टक्के उरपाचो अदमास आसा. केंद्रीय बँकेच्या अंदाजा प्रमाण जानेवारी-मार्च अशे तीन म्हयने म्हारगाय दर ४.४ टक्के उरतलें. फेब्रुवारीची आकडेवारी ताचे परस उणी आसपाक शकता. चार संस्थांनी हो अदमास लायला.
व्हड परिणाम : रुपयांचें आदलें लुकसाण भरतलें
जपानची ब्रोकरेज फर्म नोमुरा एशियाच्या एका नोटी प्रमाण भारतांत भाजीपाल्याचो दर देंवला. हाका लागून फेब्रुवारींत किरकोळ म्हारगाय दर ४ टक्के आनी जानेवारी -मार्च अशे तीन म्हयने ४.१ टक्के उरपाचो अदमास आसा. फमार प्रमाण, पीक उत्पादन वाडप आनी कारखान्यांतल्या उत्पादनांचा खर्च स्थिर उरिल्ल्यान देंविल्लो रुपया भरून येतलो.
सुशेग : जून मेरेन भाजीपाल्याचो दर उणो
बँक ऑफ बडोदाचे मुखेल अर्थतज्ज्ञ मदन सबनवीस हांणी, सद्याचो म्हारगाय दर उणो उरतलो. दरेका मळावेलो दर उणो जावपाक लागला. भाजीपाल्याच्या दर वेगान देंवला. हाका लागून फेब्रुवारींत रिटेल म्हारगाय देंवून ४.१ टक्क्यांचेर येवपाक शकता. सगल्यांत चड टोमॅटो आनी बटाट्याचो दर देवतलो. ही स्थिती जून मेरेन उरपाची शक्यता आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
