भांगरभूंय | प्रतिनिधी
सत्ताधारी आमदारां कडल्यान अर्थसंकल्पाची तोखणाय
पणजी: म्हारगायेक लागून शेतकार रडटा. उदक, विजे सयत मुळाव्या सुविधांचो उणाव आसा. हाका लागून शेतकारां सयत सामान्य मनशाक फटको बसता अशें आमदार गोविंद गावडे हांणी सांगलें. अर्थसंकल्पांत घोशणा परस कार्यवाही म्हत्वाची आसा अशें सांगतना तांणी मुख्यमंत्र्यांची सर्वसमावेश अर्थसंकल्पा खातीर तोखणाय केली.
गोंयच्या 50 टक्के लोकांक नेमान उदक मेळना. वीज पुरवण सारकी मेळना. जीएसआयडीसीचे खूबशे प्रकल्प बरीच वर्सां प्रलंबीत आसात. म्हारगाय तशेंच उदकाची समस्या आशिल्ल्यान शेतकार आयज रडटा. लोकांक जाय तें दिवपाची सरकाराची तयारी आसूंक अशें गोविंद गावडे हांणी सांगलें.
सत्ताधारी पक्षा वतीन अर्थसंंकल्पाचेर आयज आमदार निलेश काब्राल, कृष्णा साळकार, देविया राणे, उल्हास नायक तुयेंकार, डिलायला लोबो, अालेक्स सिक्वेरा, मायकल लोबो आनी अपक्ष आमदार डॉ. चंंद्रकांत शेटये हांचीं भाशणां जालीं. सगल्यांनी अर्थसंंकल्पाची तोखणाय केली.
रस्त्या कुशीचो कोयर खावन गोरवां
जाल्यांत मांसाहारी: मायकल लोबो
हेडग्या गोरवांची जतनाय घेवपा खातीर दरेका म्हालांत एक गोशाळा आसूंक जाय. कांय म्हालांनी दोन गोशाळा जाय अशी मागणी आमदार मायकल लोबो हांणी केली. हेडग्या गोरवांचें प्रमाण वाडत आसा. तांची जतनाय घेवपाक वेवस्था आसूंक जाय. खावपाक मेळनाशिल्ल्या कारणान रस्त्या कुशीचो कोयर आनी प्लास्टीक तीं खातात. हाका लागून गोरवां मांंसाहारी जाल्यात अशें तांणी सांगलें. बेवारशी सुण्यांचो प्रस्न लेगीत गंभीर जाला. कोयर प्रकल्प स्थापन करून कोयराचो प्रस्न आमी सुटावो केलो मात बेवारशी सुण्यांचेर कोणूच उपाय करिनात अशें तांंणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
