भांगरभूंय | प्रतिनिधी
पयलींच गिरायक उणें जाल्ल्यान पर्याय नाः रॅस्टोरंण्ट, शॅक धनी
पणजीः पयलींच गिरायक उणें. वयल्यान हे म्हारगायेन तकलेर आनीक वजें घातलां. भाजी आनी हेर गजाली म्हारग जाल्ल्यान जेवणा फाटल्यान कसलोच फायदो जायना. म्हारगाये बरोबर उणो जावपी पर्यटकांचो आंकडो आनीक हुस्क्यांत घालता. हें जर अशेंच चलत रावलें जाल्यार जेवणाचे दर वाडोवपा फाटल्यान आमकां दुसरो पर्याय ना, अशें रॅस्टोरंण्ट आनी शॅक धनयांनी सांगलें.
सद्या बाजारांत कांदे, टमाटा, बटाट आनी हेर भाजयां सयत कड्डनांचे दर लेगीत बरेच तेंगशेर पावल्यात. ही म्हारगाय रॅस्टोरंण्ट आनी शॅक धनयांक बसल्या. वस्तू म्हारग जायत आसात पूण जेवणाचे दर तशेंच आसात, देखून फायदो काडपाक आमकां मेळना अशें वेवसायीक सांगतात.
हे विशीं उलयतना अखील गोंय हॉटेल आनी रॅस्टोरंण्ट धनी संघटणेचे अध्यक्ष गौरीश धोंड हांणी सांगलें, गोंयांत पर्यटकांची संख्या उणी आसा आनी वयल्यान म्हारगायेन आमकां नाका पुरो करून सोडला.
भाजये बरोबर कड्डनूय म्हारग जायत आसा. फुडाराक विमानाचें इंधनय म्हारग जावपाचें आसा. तामिळनाडू, पोदुचेरी वाठारांत चक्रवादळ आयिल्ल्या कारणान पर्यटक येवपाचे उणे जाल्यात. खूबशा विमानांचें वेळापत्रक बदल्लां आनी कांय विमानां रद्द लेगीत जाल्यात. उणो जावपी पर्यटकांचो आंकडो आनी म्हारगाय हे खातीर आमचे मुखार कठीण परिस्थिती जावन रावल्या, अशें धोंड हांणी सांगलें.
आमी दोन दिसां खातीर मेन्यू वाडोवपाक शकनात आनी कशे तरी पासियेंस काडचें पडटा. पूण हे जर चालूच उरलें जाल्यार आमका फुडलो निर्णय घेवचो पडटलो. लुकसाण सोंसपाक मनशाची एक मर्यादा आसता. 8 ते 10 दिसां भितर परस्थिती जाग्यार येतली आनी वेवसाय परतून बरे भशेन चालीक लागतलो अशी आस्त धरून आमी आसात, अशें धोंड हांणी सांगलें.
पयलीं 5 ते 10 रुपयान भाजी वाडटाली तेन्ना फरक पडनासलो. पूण आतां गिरायक जायना. मेन्यू वेले दर सगले कम्प्युटरायज्ड आनी हेर डिलिव्हरी कंपनी बरोबर कबलात केल्ली आसता. पूण जेवणा फाटलें मार्जीन देंवल्या. पयली 15 रुपया फायदो जातलो आता 8 ते 10 रुपया जाता. जर आठ दिसां भितर परिस्थिती जाग्यार पडना जाल्यार दर आमकां वाडोवचेच पडटले, अशें धोंड म्हणटात.
जाल्यार परंपरीक शॅक धनी संघटणेचे अध्यक्ष मॅन्युएल कार्दोज हांणी सांगलें, तांचो वेवसाय तसो उठूंक ना. फक्त दिवाळेक बरो वेवसाय जाल्लो. पूण आतां फाटले आठ दीस वेवसाय थंड पडला.
धंदो सामकोच बारीक जाता, पूण फायदो कांयच जायना. म्हारगाय वाडत आसा, पूण आमचो मेन्यू केन्नाच वाडना. देखून जो पयसो येता तो बाजारांत घालचो पडटा. शॅकांनी लेगीत लोक ना. हे खातीर आमचे मुखार कठीण परिस्थिती उबी जावन रावल्या, अशी कागाळ कार्दोज हांणी केली.
भाजप सत्तेंत येवचे पयलीं सोऱ्याचे ठोक दर केन्नाय पांच वर्सानी वाडटाले. पूण आतां हे दर दर वर्सा वाडटात. पयलीं शॅक म्हारग म्हणटाले, पूण आतां रॅस्टोरंण्टाचे दर शॅका परस म्हारग जाल्यात. हाचे कारण म्हणल्यार रॅस्टोरंण्टांकूय म्हारगायेची किट्टी बसल्या आनी शॅका मदीं चड सर्त लागल्या. शॅकां फक्त नुस्त्यांचेर फायदो काडटात. दर्यादेगेरच बाजारभावान आमकां नुस्ते घेवपाक मेळटा. नुस्त्याचे दर आमकां बदलपाक मेळटात. पूण हेर खाणांचे दर आमकां तशेंच दवरचे पडटात. पूण दर्यादेगेर नुस्तें खावपी पर्यटक मेळपाक सामकें कठीण अशेंय कार्दोज हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
