भांगरभूंय | प्रतिनिधी
काँग्रेसीचीं मडगांवां निदर्शनां : गॅस सिलिंडराचें दरवाडीचो निशेध
भांगरभूंय । प्रतिनिधी
मडगांव : भाजप सरकार हें सर्वसामान्यांचें सरकार न्हय. म्हारगाय वाडोवन लोकांचेर अर्थीक वजें वाडयलां. व्हड व्हड इमारती बांदल्यो म्हूण उदरगत जायना, गरिबांचीय उदरगत जायना. गॅस सिलिंडर धरून गरजेच्यो वस्तू म्हारग जाल्यात. ही म्हारगाय देंवोवपाची, अशी मागणी काँग्रेसी वतीन मडगांवां मोर्चा वेळार केली.
दक्षीण गोंय जिल्हो काँग्रेस समिती वतीन जिल्होधिकारी कार्यालया सावन कदंब बसस्टॅण्डा मेरेन मोर्चो काडून गॅस सिलिंडराच्या वाडिल्ल्या मोलाचो निशेध केलो.
मनिषा उसगांवकार हांणी सांगलें, भाजप सरकारान वेंचणूक जिखचे खातीर व्हड व्हड आस्वासनां दिल्लीं. काँग्रेसीच्या काळांत मोल वाडयले जाल्यार आंदोलनां करताले, पूण आतां भाजपा सरकाराच्या काळांत म्हारगायेचेर तोंडांतल्यान एक उतर काडिनात. काँग्रेसीच्या काळांत कॅरोसीन मेळटाले ते बंद केलें. रेशना खातीर तळमळचें पडटा. म्हारगाय वाडिल्ल्यान बायलांक घर संवसार चलोवप कठीण जालां.
भाजपान ‘अच्छे दिना’चें आस्वासन दिल्लें. ते ‘अच्छे दिन’ हेच काय कितें, तें भाजपान सांगपाची गरज आसा, अशें जिल्हो पंचायत वांगडी मिशेल रिबेलो हांणी सांगलें.
दक्षीण गोंय जिल्होध्यक्ष सावियो डिसिल्वा हांणी सांगलें, देशाक मेळची इंधन 38 रुपया लिटर मेळटा, तरी लेगीत ताचे वयल्या कराचे रकमेंत व्हड वाड करून 100 रुपया वयर व्हेलां. गोंय सरकारान विवीध येवजण्यो चालीक लावन लोकांक अर्थीक लाव दिता अशें सांगतात, पूण ते पयशे लेगीत वेळार मेळनात. वाडिल्ल्या गॅस सिलिंडराच्या मोलाक लागून बायलांचें म्हयन्याचें गणीत इबाडटलें. हे खातीर गॅस सिलिंडराची दरवाड फाटी घेवची अशी तांणी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
