म्हामार्गाचें रुंदीकरण थळाव्यांक विस्वासांत घेवनूच

भांगरभूंय | प्रतिनिधी

आमदार प्रवीण आर्लेंकार: लुकसाण भरपाय बेगीन मेळोवन दिवपा खातीर यत्न करपाचें उतर

भांगरभूंय । प्रतिनिधी

पेडणें: राष्ट्रीय म्हामार्गाच्या रुंदीकरणाचें काम उगवें वाठारांत 1 नोव्हेंबराक थळाव्या लोकांनी आनी बागायतदारांनी आडायिल्लें. जे मेरेन लुकसाण भरपाय मेळना ते मेरेन रस्त्याचें रुंदीकरण करपाक दिवचे नात, अशी भुमिका थळाव्या लोकांनी घेतिल्ली. ताचेर योग्य उपाय काडचे खातीर 2 नोव्हेंबराक थळावे आमदार प्रवीण आर्लेंकार हांणी विशेश बसका आपयिल्ली. म्हामार्गाचें रुंदीकरण थळाव्यांक विस्वासांत घेवनूच जातलें, अशें हे बसकेंत आर्लेंकार हांणी सांगलें. तशेंच लुकसाण भरपाय बेगीन मेळची हे खातीर यत्न करतलों, अशें तांणी सांगलें.

उगवेंच्या माऊली मंदीर मंडपांत आयोजीत केल्ले बसकेक भूंय संपादन अधिकारी चंद्रकांत शेटकार, राष्ट्रीय म्हामार्ग रस्तो अधिकारी आत्माराम गावडे, मोपा उगवें सरपंच सुबोध महाले, अधिकारी आनी थळावे लोक व्हड संख्येन हाजीर आशिल्ले.

रस्त्याचें रुंदीकरण कशे तरेन करतले, सर्वीस रस्तो कसो आसतलो, थळावे लोक आनी शेतकार हो राष्ट्रीय मार्ग कसो हुपतले, हे संबंदांत कांय सुचोवण्यो थळाव्या लोकांनी अधिकाऱ्यां मुखार केल्यो. तशेंच जे मेरेन लुकसाण भरपाय मेळना आनी पुराय रस्त्याचो आराखडो सादर करिनात ते मेरेन रस्त्याचें काम करचें न्हय, अशेंय तांणी सांगलें.

जांच्यो जमनी गेल्यात तांकां योग्य ती भरपाय मेळोवन दिवचे खातीर आपूण मुख्यमंत्री डॉ. प्रमोद सावंत हांचे कडेन चर्चा करतलं, अशें उतर आमदार आर्लेंकार हांणी दिलें. जमनी संबंदांतली सगळीं कागदपत्रां उगवें मोपा सरपंच आनी पंचायत मंडळान जापसालदारकी घेवन सादर करचीं. म्हामार्गाच्या कामांत कोणेच आडखळ हाडची न्हय. जे प्रस्न आसात ते एकठांय बसून सुटावे करपाचे यत्न करुया, अशें आर्लेंकार हांणी सांगलें.

मोपा विमानतळ, तिळारी प्रकल्प हाका आदींच उगवेंच्या लोकांच्यो जमनी गेल्यात. तेरेखोल न्हंयेच्या पात्रांत शेती बागायतीचीं झाडां गेल्यांत. आतां रस्तो रुंदीकरणा खातीर व्हड प्रमाणांत झाडां मारतले. हे संबंदांत थळाव्यांक अजून मेरेन विस्वासांत घेवंक नात. पयलीं लुकसाण भरपाय दिवची आनी उपरांत रस्तो करचो, अशी सुचोवणी आदले सरपंच विनायक महाले हांणी केली. ह्या वेळार सुबोध महाले, रामदास महाले, शंकर महाले, प्रमोद परब आ हेरांनी आपापल्यो समस्या मांडल्यो.

कागदपत्रां दियात, पयशे व्हरातः चंद्रकांत शेटकार

जमीन संपादन करपाची प्रक्रिया चलताली तेन्ना जांकां नोटीस जारी केल्ली तांणी त्याच वेळार आपल्या जमनींची कागदपत्रां सादर करून सरकाराक म्हायती दिवप गरजेचें आशिल्लें. पूण कांय जाणांनी अजून मेरेन आपलीं कागदपत्रां सादर करूंक नात. जमीन संपादन प्रक्रियेचें सगळे पयशे सरकारी तिजोरेंत जमा आसात. शेतकारांनी आपलीं कागदपत्रां सादर करून ते केन्नाच व्हरचे, अशें चंद्रकांत शेटकार हांणी सांगलें.