भांगरभूंय | प्रतिनिधी
म्हापशें: चवथीच्या सणा खातीर श्रीफळ म्हळ्यारूच नाल्ल हो सामको म्हत्वाचो. वर्सान वर्स ह्या नाल्ल्याचें दर वाडतूच आसात. चवथीच्या वेळार लोकांक नाल्लांचो उणाव जाणवचो न्हय आनी तांची गरज भागोवचे खातीर म्हापशेंचे समाज कार्यकर्ते योगेश केळकार आनी समीर हरमलकार हांणी अजाप करपा सारक्या दरान उपलब्ध केल्ले नाल्ल घेवपाक लोकांची व्हडली गर्दी केल्ली.
म्हापशेंच्या डॉ. राममनोहर उद्याना लागसारचे इमारतींतल्या आपल्या दुकानांतल्यान केळकार आनी हरमलकर हांचे कडल्यान शेनवारा २३ आनी आयतारा २४ ऑगस्टाक हे नाल्ल विकले. हाचो लाव सुमार १ हजार ६०० लोकांनी घेतलो. फकत दोन रुपयान एक नाल्ल अशे दरेका गिरायकाक तांणी १० रुपयांक ५ नाल्ल विकले. फाटल्या पांच वर्सां सावन परवडपी दरांत नाल्ल विकपाचो हो उपक्रम केळकार हांणी राबयला. समीर हरमलकार आनी अशोक च्यारी हे ह्या समाजीक कार्यांत केळकार हांकां सहकार्य करतात.
योगेश केळकार हांणी म्हणलें, समाजीक कार्य हे भावनेंतल्यान आमी हो उपक्रम राबयला. सुमार ८ हजार नाल्ल आमी लोकांक सामको सवाय विकला. फाटल्या वर्साय ५ ते ६ हजार नाल्ल लोकांक ह्याच दरांत विकिल्ले. फाटल्या वर्साचे तुळेंत अंदूं नाल्लाचें दर दुपेटीन वाडलां. हाका लागून आमचे कडेन नाल्ल विकत घेवपाचो लोकांचोय आंकडो बरोच वाडला.
आमी हो उपक्रम कोरोना काळा पसून चालीक लायिल्लो. तेन्ना लोकां मुखार समस्या आशिल्ली. चवथीक नाल्ल सामके गरजेचे आशिल्ल्यान ते आमी सामके सवाय विकपाक सुरवात केली. आमचो हो उपक्रम पळोवन गोंयच्या हेर कांय समाजकार्यकर्त्यांनी अशेच उपक्रम सुरू केले. असोच आनीकूय समाजकार्त्यांनी फुडकार घेवचो आनी लोकांक मजत करची असो उलो केळकार हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
