भांगरभूंय | प्रतिनिधी
लुबाडणुकेचो आरोप; फक्त 5 रुपया वाडयिल्ल्याचें पालिकेचें म्हणणें
भांगरभूंय । प्रतिनिधी
म्हापशें: म्हापशें बाजारपेठेंतल्या वाडीव सोपो करा वयल्यान विक्रेत्यां मदीं घुस्पागोंदळ जाला. फक्त पांच रुपया वाडयिल्ल्याचें पालिका म्हणटा जाल्यार पालिका कर्मचाऱ्यां कडल्यान दरा परस चड कराची वसुली करता, असो आरोप विक्रेत्यांनी केला.
हालींच जाल्ले पालिका मंडळाचे बसकेंत मार्केटांतल्या सोपो करांत वाड केल्या. नव्या दरा प्रमाण शेडी भायर उक्ताडार बसपी विक्रेत्यां कडल्यान 15 रुपया आनी शेडींत बसप्यां कडल्यान दर मिटराक 25 रुपया तशेंच दोनूय विक्रेत्यांक कोयर कर 5 रुपया असो दर लागून करपाचो निर्णय घेतिल्लो. ते प्रमाण पालिकेन 1 जुलयच्यान पालिका कर्मचाऱ्यां कडल्यान सोपो वसुलीची प्रक्रिया सुरू केल्या. ते खातीर मार्केटांत वेगवेगळ्या सुवातांचेर नव्या सोपो कराची म्हायती दिवपी तकटे लायल्यात.
प्रत्यक्षांत हो सोपो घेतना कोयर करा सयत एका मिटराक 30 रुपया बदला 40 रुपया आनी तीन मिटराचे खांटीक 50 बदला 90 रुपया घेतात. तशेंच शुक्रारा आनी आयतारा नव्या घोळट्या विक्रेत्यां कडल्यानूय चड रक्कम वसूल करतात. थारायिल्ल्या दरा परस चड रक्कम वसूल करून पालिकेन सोप्याच्या नांवान लुबाडणूक चलयल्या, असो आरोप विक्रेत्यांनी केला. फेरी विक्रेते सेनेचे अध्यक्ष सुदेश हसोटीकार हांणी सांगलें, बाजारपेठेंत फुलांचें मार्केट, भाजी मार्केट, मडकी मार्केट आनी नुस्त्या मार्केटूच शेडींत आसात. फुटपाथ आनी रस्ते शेडींत येनात. दुकान इमारतींच्या पाखाच्या काँक्रिटाचे कुडके पडटात. तातूंतल्यान पावसाचें उदक पोंवता. ह्या फुटपाथांचेर पावसाची वावझड बसता. अशा वेळार तांचो शेडींत आस्पाव करप योग्य न्हय. नव्या दरा प्रमाण 25 आनी 5 मेळून 30 रुपया जाता, पूण तांचे कडल्यान 40 रुपया घेतात, असो दावो तांणी केलो.
एकठांय पयशे घेतिल्ल्यान घुस्पागोंदळः नगराध्यक्ष
बाजारपेठेंतल्या सोप्यांत पालिका मंडळान चड वाड करूंक ना. फक्त पांच रुपया वाड केल्या. ह्या करा वांगडा कोयर कराचे 5 रुपया एकठांय घेतात, ताका लागून विक्रेत्यांचो घुस्पागोंदळ जाला. नव्या करा प्रमाण 15 आनी 25 रुपया सोपो कराचें शुल्क आसा, अशी म्हायती नगराध्यक्ष प्रिया मिशाळ हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
