भांगरभूंय | प्रतिनिधी
गोंयच्या हॉटेलांनी जाताली पुरवण; एफडीएची कारवाय
म्हापशें: फाटल्या कांय म्हयन्यां सावन अन्न आनी वखदां प्रशासन धाडी घालीत आसा. हे कारवायेक लागून गोंयांत घातक अन्नपदार्थाची पुरवण करून कांय जाण चलयत आशिल्ल्या लोकांच्या जिवा कडलो खेळ उक्तडार हाडला. तातूंत आतां देशी धंय युनीट एफडीएन उक्तडार हाडून गोंयांत खूबशे कडेन बनावट पद्दतीन अन्नपदार्थ निर्मिती आस्थापनां आशिल्ल्याचें उक्तडार आयलां.
काल (शुक्रारा) सकाळीं गांवसावाडो, म्हापश्यां हळशीक सुवातेर देशी धंय तयार करपी बेकायदो आस्थापनाचेर अन्न आनी वखदां प्रशासनान धाड घाली. फाटल्या तीन वर्सां सावन हें युनीट गरजेची परवानगी घेनासतना चलतालें अशें चवकशेंतल्यान दिसून आयलां.
एफडीएन ह्या युनिटाच्या धनयाक 20 हजार रुपयांचो दंड घाला. तशेंच आस्थापनांतलें सगलें धंय आनी दुदाचे पदार्थ जप्त केल्यात. तशेंच ही सुवात तत्काळ रिती करपाचे निदेश दिल्यात.
हें धंय तयार करपी युनीट कसलीच परवानगी घेनासतना चलतालें. युनिटांतलें धंय, पनीर आनी हेर दुदाचे पदार्थ बार्देस, तिसवाडी, पेडणें आनी हेर वाठारांतल्या हॉटेलांनी, रेस्टॉरंण्टांनी सकाळच्या वेळार वाहनांतल्यान वितरीत करताले. फाटल्या कांय दिसां सावन ह्या युनिटाचेर आमी पाळत दवरून आशिल्ले. गांवसावाडो, म्हापशेंच्या ह्या युनिटाची सुलूस लागतकच थंय आमी धाड घाली. हें युनीट हळशीक सुवातेर चलतालें. ताका लागून संबंदिताचेर दंडात्मक कारवाय करून युनीट रोखडेंच बंद करपाचो आदेश दिला अशी म्हायती एफडीएच्या अधिकाऱ्यांनी दिली.
युनिटाचे चालक चंद्रपाल हांणी सांगलें, हांगा धंय तयार करतात. तशेंच कोल्हापूर सावन जावपी एका दूद कंपनीचें दूद, धंय आनी पनीराचो हांगा सावन हॉटेल, रेस्टॉरंण्टांक पुरवण करतात. पदार्थांची पुरवण करपाचो परवानो आपले कडेन आसा. पूण धंय तयार करपाचो परवानो नाशिल्ल्याचें तांणी सांगलें.
देशी धंय तयार करपी हे युनीट धंय तयार करून ते प्लास्टिकाच्या कंटेनारांनी पॅक करताले. उपरांत हें धंय बार्देस, तिसवाडी, पेडणें म्हालांतल्या नामनेच्या हॉटेलांनी, रेस्टॉरंण्टांनी आनी दुकानांनी ताची पुरवण करताले. ह्या युनिटांत कांय प्रमाणांत पनीराचो सांठो सांपडला आनी ह्या पनीराच्या माध्यमांतल्यान हें धंय तयार करीत आशिल्ल्याचो दुबाव एफडीएच्या अधिकाऱ्यांनी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
