भांगरभूंय | प्रतिनिधी
तिसऱ्या माळ्या वयल्या कार्यालयांक त्रास
भांगरभूंय । प्रतिनिधी
म्हापशें : म्हापशेंच्या सरकारी संकूल इमारतीच्या पाख्याचें दुरुस्तीकाम पावसाक लागून आडखळ्ळां. हाका लागून पाखें पोंवता. हाचो त्रास इमारतीच्या तिसऱ्या माळ्यार आशिल्ल्या कार्यालयांक जाला. सकाळीं कार्यालयां सुरू करताच कर्मचाऱ्यांक विजेचो शॉक लागिल्ल्यान कर्मचाऱ्यां मदीं भंय पातळ्ळो. हे गळटीक लागून कंप्युटर उपकरणां पेड्डेर जावचीं न्हय हे खातीर तांचेर कापेती घातल्यो.
हे गळटीक लागून संकुलांतल्या नगर नियोजन, कामगार आयुक्त, भौशीक बांदकाम खातें ह्या सरकारी कार्यालयांतल्या कामकाजाचेर परिणाम जालो. पाख्या वयल्यान पोंवपी पावसाचें उदक वयल्या कार्यालयांतल्या वीज आनी कंप्युटर उरकरणां, फर्निचर पेड्डेर जाले. तशेंच माळ्यार लेगीत व्हड प्रमाणांत उदक सांचिल्लें.
ही तीन माळ्यांची इमारत पोरणी जाल्या. पाखें पोंवता हे खातीर ताचे दुरुस्तीकामा भौशीक बांदकाम खात्याच्या इमारत विभागान हातांत घेतिल्लें. मात आडवेळ्या पावसाक लागून हें काम आडखळ्ळें. ताका लागून कंत्राटदाराक नळे घालपाक जमलें ना. हे खातीर घोग्यांनी पडपी पावसाक लागून पाखे पोंवपाक लागलें. गळटेक लागून सगळ्या कार्यालयांच्यो वण्टी ओल्यो जाल्यात. फाटल्या आठ दिसां सावन ही समस्या निर्माण जाल्या. शुक्रार सावन ही समस्या चडूच वाडल्या. शेनवारा आनी आयतारा सुटी आशिल्ली. सोमारा 26 मेक सकाळीं कर्मचारी आनी अधिकाऱ्यांनी कार्यालयांत येवन वीज पुरवण आनी कंप्युटर उपकरणां सुरू करतना कांय कर्मचाऱ्यांक विजेचो शॉक लागलो. हाका लागून सगळ्यां मदीं भंय पातळ्ळो. उपरांत हीं उपकरणां पेड्डेर जावचीं न्हय हे खातीर तांचेर कापेत घातली. तशेंच हे विशीची म्हायती सगळ्या कार्यालय मुखेल्यांनी आपल्या वरिश्ठांक लेखी स्वरुपांत कळयली. मात हे गळटीक लागून कार्यालयीन कामकाज बंद पडलें.
पाख्याची दुरुस्ती ताकतिकेन करपाची सुचोवणी
पाख्याक गळटी लागल्या. तशेंच काँक्रिटाचे कुडके खाला पडटत. ताका लागून अर्दवट आशिल्लें पाख्याचे दुरुस्तीकाम ताकतिकेन करचें, अशी सुचोवणी शौभीक बांदकाम खात्याच्या अधिकाऱ्यांक केल्या, अशी म्हायती उपजिल्होधिकारी वर्षा परब हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
