भांगरभूंय | प्रतिनिधी
मामलेदार कार्यालयाची कारवाय; जेसीबी जप्त, कारवाय करपाचे कोमुनिदादीक निर्देश
भांगरभूंय । प्रतिनिधी
म्हापशें: गांवसवाडो, तार म्हापश्या राष्ट्रीय म्हामार्गाचेर मातयेचो भराव घालून कोमुनिदादची शेत जमीन पुरोवपाचो प्रकार बार्देश मामलेदार कार्यालयान बंद उडयलो. एक जेसीबी लेगीत जप्त केलें. पुलीस आनी उत्तर गोंय कोमुनिदाद प्रशासकांक संबंदितांचेर गोंय जमीन बांदकाम प्रतिबंधक कायद्या खाला कारवाय करची, असो निर्देश दिला.
राष्ट्रीय म्हामार्गा लागसार तार गांवसवाड्यार पीटी सीट नं. 150, चलता नं 2/1 आनी 2/2 आनी पीटी शीट नं 102, चलता नं. 2/2 तले शेत जमनींत मातयेचो भराव घालून थंय पक्कें बांदकाम करपाची तयारी चलता, अशी कागाळ मामलेदार कार्यालया कडेन आयली. ते प्रमाण ताकतिकेन सोमारा 17 एप्रीलाक सांजेच्या 3.50 वरांच्या सुमाराक मामलेदार कार्यालयाचे अव्वल कारकून शैलेश कोठवाळे, सर्कल निरिक्षक अपर्णा गारुडी आनी सतीश धुरू ह्या पंगडान थंय धाड घातली. त्या वेळार घडणुकेचे सुवातेर म्हामार्गा वटेन सुवातेक कपड्याच्या आदारान आडोस केल्लो आनी भितर जेसीबीच्या आदारान मातयेचो भराव घालून जमीन सपाट करपाचें काम सुरू आशिल्लें. तें काम पंगडान बंद उडयलें आनी म्हापशें पुलिशेक आपोवन जेसीबी जप्त करून तांचे सुवादीन दिलें.
हे जमीन पुरोवपाचें बेकायदो काम गीतेश वाळके करता, अशें पंगडाक चवकशेंत कळ्ळें. ताका लागून गोंय जमीन बांदकाम प्रतिबंधक कायदो 1995 खाला संबंदिताचेर योग्य ती कारवाय करची, असो आदेश मामलेदार प्रवीण गांवस हांणी कोमुनिदाद प्रशासक आनी म्हापशें पुलीस निरिक्षकांक दिला.
चार वर्सां सावन चलता बेकायदो काम
मातयेचो भराव घालून जमीन पुरोवपाचो प्रकार फाटल्या चार वर्सां सावन चालू आसा. सध्या थंय मार्बल विक्रीचो वेवसाय चलता. थळाव्या लोकांनी तशेंच काँग्रेस फुडाऱ्यांनी ह्या बेकायदो कामाचेर वेळावेळार आवाज काडिल्लो, पूण गरजेची कारवाय संबंदितां कडल्यान जावंक नाशिल्ली.
बेकायदो दुकानाक वीज कनेक्शन
शेत जमीन पुरोवपाच्या बेकायदो प्रकारा संबंदांत सात दिसां भितर पळोवणी अहवाल सादर करपाचे निर्देश तेन्नाचे म्हापशें पालिका मुख्याधिकारी सीताराम सावळ हांणी पालिका अभियंता विभागाक दिल्लो, पूण अजून तो अहवाल पालिका अधिकाऱ्यां कडेन सादर जावक ना. तरी लेगीत थंय थाटिल्ल्या दुकानाक मात पालिके कडल्यान वीज कनेक्शना खातीर ना हरकत दाखलो दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
