भांगरभूंय | प्रतिनिधी
शेतकामाक आडखळीं; रस्त्या पोंदचें पायप चोंदलां
भांगरभूंय । प्रतिनिधी
म्हापशें: बोडगिणी म्हापश्यां गटार चोंदिल्ल्यान शेतांत पावसाचें उदक सांचलां. ताका लागून शेतांत काम करपाक आडखळीं निर्माण जाल्यात. हे खातीर शेतकारांनी नाराजी उक्तायल्या.
बोडगेश्वर देवळा मुखार हजारांनी चौखण मिटर शेत जमनीर शेतकार वर्सांन वर्स शेत रोयतात. पूण अंदूं पावसाचें उदक व्हावून वचपा खातीर रस्त्या पोंदां घातिल्ल्या पायपांत चिखल सांचून तें चोंदलां. ताका लागून पावसाचें उदक शेतांत भरलां. ह्या उदकाक लागून शेतांतलीं कामां करपाक मेळना.
हे शेतजमनी लागसार आशिल्लो मुखेल व्हाळूय भरून उरला. सगळ्याच वटांनी उदकाची व्हावून वचपाच्यो वाटो बंद जाल्यात. सरकारान ताचेर सक्ष दिवन उपाय काडचो, जे वरवीं शेतां कसपाक सोयीचें जातलीं, अशी मागणी शेतकारांनी केल्या.
बोडगेश्वर शेतकार संघाचे अध्यक्ष स्वप्नील साळगांवकार हांणी सांगलें, वर्सान वर्स ह्या शेतांत शेतकार शेतां कसतात. पूण दोन दीस लागिल्ल्या पावसाचें उदक शेतांत भरलां. ताका लागून शेतकारांक शेतांत कामां करपाक मेळना. रस्त्याचें बांदकाम करतना शेतांत चिखल घातिल्लो. आमकां पावसाचें उदक व्हावून वचपा खातीर वाट करून दिवपाचें आस्वासन दिल्लें, पूण उपरांत कांयच करूंक ना. शेतकार श्रीकांत पार्सेकार हांणी सांगलें, कळंगूटे आनी पणजेचे वटेन रस्त्याच्या कुशीचो वाठार पावसाच्या उदकांत उपाट भरला. हाचो परिणाम म्हणल्यार शेतकार शेतांनी काम करपाक शकनात. खोर्ली दोंगरा वयल्यान येवपी उदक न्हंयेचे दिशेन वचपाचे वाटेर साबार आडखळीं निर्माण जाल्यात. ताका लागून तें उदक शेतांनी घुसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
