भांगरभूंय | प्रतिनिधी
रस्तो दुरुस्त करपाक दोन दिसांची मुजत; डांबर, खडी भेट दिवपाची शिटकावणी
भांगरभूंय । प्रतिनिधी
म्हापशें: म्हापशें शारांतल्या सगळ्या रस्त्यांचेर फोंडकुलां पडून चाळण जाल्या. हे समस्येक लागून म्हापशेंकार बेजारल्यात. हाचे कडेन सरकार तशेंच नगरपालिकेचें लक्ष ओडचे खातीर समविचारी समासज वावुरप्यांनी एकठांय येवन निदर्शनां केलीं. दोन दिसांत रस्ते दुरुस्त जाले नात जाल्यार म्हापशें पालिकेच्या कार्यालयांत वचून जाब विचारतले, तशेंच अधिकाऱ्यांक डांबर आनी खडी भेट दितले, अशी शिटकावणी आंदोलन करप्यांनी दिली.
शेनवारा 31 ऑगस्टाक सांजे वेळार खोर्ली- शीम वाठारांत आंदोलन करप्यांनी उदक सांचिल्ल्या फोंडकुलांत कागदाचीं व्हडीं, कमळ चिन्न आशिल्ले कागद, बनावट नोटी सोडून तेचवरी खडी, सिमेंट ब्लॉक आनी क्रिकेट पॅडा, तकलेर हॅल्मेट घालून सरकारा सयत थळाव्या नगरपालिकेच्या विरोधांत घोशणा दिल्यो. ह्या वेळार काँग्रेसीचे विजय भिके, चंदन मांद्रेंकार, नगरसेवक अॅड. शशांक नार्वेकार, शिवसेना राज्य मुखेली जितेश कामत, झायगल लोबो, सितेश मोरे आनी हेरांचो आस्पाव आशिल्लो. विजय भिके हांणी सांगलें, सरकार आनी थळावी नगरपालिका सध्या न्हिदेंत आसा. हाका लागून सर्वसामान्य लोकांक रस्त्या वयल्या फोंडकुलांचे समस्येक फुडो करचो पडटा. ह्या फोंडकुलांक लागून खूब जाण पडून जखमी जातात. गाडयांचें लुकसाण जाता आनी मानसीक मनस्ताप सोंपचो पडटा. ह्या संवेदनशुन्य सरकाराक जाग येवची हे खातीर आमी हीं निदर्शनां करतात. सोमार मेरेन रस्त्यांची दुरुस्ती जाली ना जाल्यार पालिकेचेर धडक दितले.
मुख्यमंत्र्यांचो नोव्हेंबर तीन वर्सांत आयलोच ना !
म्हापशें शारा सयत गोंयांतल्या रस्त्यांची आवतिकाय जाल्या. ह्या फोंडकुलांक लागून शारांतल्या एका तरणाट्याक जीव वगडावचो पडिल्लो. मुख्यमंत्र्यान नोव्हेंबरा उपरांत गोंयांतल्या रस्त्यांचेर एकूय फोंडकूल दिसचें ना, अशें सांगिल्लें. पूण तो नोव्हेंबर फाटल्या तीन वर्सांत केन्नाच येवंक ना, पूण फोंडकुलांचो आकार मात दिसान दीस वाडत आसा. थळावो आमदार रस्त्याचे दुरुस्तीच्या कामांचे सोशल मिडियाचेर व्हड झेत मारता. पूण वस्तुस्थिती वेगळी आसा. आमदार जायरातबाजी करता, असो आरोप जितेश कामत हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
