भांगरभूंय | प्रतिनिधी
म्हापशें ः गावसावाडो, म्हापशेंच्या मोडपाक पाविल्ल्या घराची वणट कोसळपाचे स्थितींत आशिल्ल्यान शेजारचीं घरां, तशेंच थळाव्यांक धोको निर्माण जाला.
शेनवारा सांजेवेळार घोग्यांनी पडपी पावसाक लागून ह्या घरा कुशीकचीं झाडां पडिल्ल्या घराचो कांय भाग कोसळ्ळो. तशेंच पांयवाटेच्या कुशीक आशिल्ली ह्या घराची वणटूय कोसळपाचे अवस्थेंत आसा. हाका लागून सध्या निहोती अमरनाथ पुजारी हांच्या घरा सयत कुशीकच्या घरांक धोको निर्माण जाला.
हे घडणुकेची म्हायती मेळटांच पालिका कर्मचारी तशेंच म्हापशें उजो पालोवपी दळाच्या जवानांनी घडणुके सुवातेर वचून पळोवणी केली. घराचो भाग कोसळिल्ल्यान पुजारी हांच्या नळाचो मिटर आनी हेर मालमत्तेचें लुकसाण जालां. हरशीं ह्या घरा शेजराक सदांच दोगां भुरगीं खेळटालीं. काल मात तीं पावसाक लागू थंय खेळपाक वचूंक नाशिल्ल्यान वाटवली.
हे विशीं पालिकेक म्हायती दिल्या. तशेंच लेखी निवेदन दिल्लें. आयचे घडणुकेचीय म्हायती दिल्या. येवपी काळांत कसलीच वायट घडणूक घडची न्हय म्हणून म्हापशें पालिकेन ह्या घराचीय धोको निर्माण करपी वणट मोडची, अशी मागणी निहोती पुजारी हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
