म्हापश्यां मॉन्सुना पयलींच्या कामांक सुरवात

भांगरभूंय | प्रतिनिधी

म्हापशें: पावस कांय दिसांनीच सुरू जातलो, हे फाटभुंयेर म्हापशें पालिकेन मॉन्सुना पयलींच्या कामाक सुरवात करून गटारांच्या नितळसाणीचीं कामां हातांत घेतल्यांत. बाजारपेठेंतल्या गटार उस्पुपाच्या कामांक गती दिवपा सयत पालिकेच्या दोन प्रभागांतलीं कामां पुराय जाल्यांत.

नगररपाका पयलीं मार्च-एप्रील म्हयन्यांत गटारांची नितळसाण करताली. पूण लोकसभा वेंचणूक आचारसंहिता आनी पालिकेच्या सुस्त प्रशासनाक लागून हीं कामां उसरां सुरू जालीं. केंद्रीय वेंचणूक आयोगा कडल्यान परवानगी मेळ्ळे उपरांत म्हापशें पालिकेन फाटल्या सप्तका सावन शारांतल्या मॉन्सूनपूर्व गटारांच्या नितळसाणेचीं कामां हातांत घेतल्यांत.

हे खातीर पालिकेन दोन खाजगी कंत्राटदाराची नेमणूक केल्या आनी ह्या कामा खातीर 52 लाखांची निविदा काडल्या. मार्केटांतल्या गटारांचे नितळसाणे खातीर हातूंतलो एक समर्पीत कंत्राटदार नेमला. शारांतल्या प्रभाग 2 आनी प्रभाग 10 मदल्या गटारांची नितळसाणेचीं कामां पुराय जाल्यांत. जाल्यार सद्या प्रभाग 15 मदलें काम चालू आसा.

कंत्राटदारा कडल्यान गटारांची नितळसाळ सुरू आसून मार्केट आनी प्रभागांतल्या कामांचेर लक्ष दवरपा खातीर पालिकेन आपले कनिश्ठ अभियंते आनी पर्यवेक्षकाची नेमणूक केल्या. मार्केटांतल्या गटारांची नितळसाण रातच्या वेळार करतात.

आचार संहितेक लागून नितळसाणीचीं कामां चालीक लावपाक कळाव जाल्लो आसलो तरी सद्या कामांनी गती घेतल्या. दोन प्रभागांतलीं कामां पुराय जाल्यांत आनी तिसऱ्या प्रभागांतलीं कामां सुरू आसात. ज्या प्रभागांनी हुंवाराची शक्यताय वा उदकच्या निचऱ्याचेर परिणाम जाता अशा प्रभागांतलीं कामां सुरवातेक घेतल्यांत. मुखेल नाल्यांतलो गाळ उस्पुपा खातीर उदका स्रोत खात्या कडेन संपर्क सादला आनी तांणी रोखडेंच काम हातांत घेतले अशें आस्वासन दिलां अशें म्हापशेंची नगराध्यक्ष डॉ. नूतन बिचोलकार हांणी सांगलें.

म्हापशें मार्केट आनी शारांत भुंयगत वीज वाहिन्यांच्या कामा वेळार रस्ते खणिल्ले तेन्ना फातर आनी माती गटारांनी उडयिल्ली. हाका लागून गटारांतल्या गाळाचें प्रमाण तिपेटीन वाडलें. हो मातयेचो भराव काडून रस्ते पयलीं भशेन करपाची जापसालदारकी वीज आनी भौशीक बांदकाम खात्याची आसा. पूण संबंदितांनी हाचे कडेन आडनदर केल्ल्यान पालिके मुखार समस्या निर्माण जाल्या.