भांगरभूंय | प्रतिनिधी
म्हापशें : म्हापशेंचे मिलाग्रीस सायबिणीचें फेस्त भक्तीभावान सोमारा मनयलें. ईस्टराच्या तिसऱ्या सोमारा हें फेस्त मनयतात. ह्या फेस्ताक गोंया वांगडाच शेजारच्या राज्यांतल्या भाविकांनी व्हड संख्येन हाजेरी लायली.
भक्तांच्या उल्याक पावपी सायबीण म्हूण क्रिस्तांव तशेंच हिंदू सयत हेर धर्मांतल्या भाविकांची श्रद्धा आसा. फेस्ता निमतान मिलाग्रीस सायबीण आनी तिचे हांडीर आशिल्ल्या जेजूच्या पुतळ्याक भाविकांनी तेल, फुलां आनी मेणवाती ओंपल्यो.
मिलाग्रीस सायबिणीच्या फेस्ता निमतान सेंट जेरॉम चर्चींत फांतोडेच्या 5.30 वरां सावन सांजे मेरेन प्रार्थना जाल्यो. ह्यो प्रार्थना कोंकणी आनी इंग्लिशेंत जाल्यो.
सकाळीं 10 वरांचेर फेस्ताची मुख्य प्रार्थना धर्मगुरू फा. एडसन फर्नांडीस हांच्या मार्गदर्शना खाला जाली. ह्या वेळार फा. लिओनार्डो मोरायस, फा. सावियो पिंटो आनी फा. आगुस्तीन आल्फोन्सो तशेंच हेर फादर हाजीर आशिल्ले. ताचे आदीं चर्चींतली मिलाग्रीस सायबीँ आनी तिचे हांडीर आशिल्लो जेजू हांच्या तकलेचेर मुकूट घातलो.
दर वर्सा वरीं फेस्ता निमतान चर्ची वतीन पांच दीस म्हणल्यार 9 मे मेरेन विवीध सांस्कृतीक आनी मनरिजवणेच्यो कार्यावळी आयोजीत केल्यात. तातूंत खेळ, पाककला, हावझी जातल्यो. 8 मेक ‘म्होजी माय म्होजी सासुमांय’ आनी 9 मेक ‘फातोराच्या काळजाचो’ हे तियात्र सांजेच्या 7 वरांचेर सुरू जातले.
चर्च वाठारांतल्या दोनूय रस्त्यांचे कुशीक वर्सावळी प्रमाण फेरी मांडल्या. तातूंत कपडे, खेळणी, मिठाय, चणे, घरगुती सजावटीचीं दुकानां आसात. चर्च ते अलंकार थिएटरा मेरेन मांडिल्लीं हीं दुकानां आठ दीस म्हणल्यार सोमारा 12 मे मेरेन जाल्यार कोमुनिदाद घरा मेरेनची फर्निचराचीं दुकानांक 15 दीस म्हणल्यार सोमारा 19 मे मेरेन परवानगी दिल्या.
म्हापशेंचो धर्मीक एकचार राखपी हो एकसुरो फेस्ताचो उत्सव आसा. आंगवणीक पावपी देवी म्हूण मिलाग्रीस सायबिणीचेर भाविकांची श्रद्धा आसा. हेच खातीर सायबिणीक तेल, मेणवाती, पयशे, फुलां, मेणा पासून तयार केल्ले मनशाचे कुडीचे अवयव तशेंच साडी ओंपतात. ह्या दिसा भावीक कट्टी घेवन भीक मागतात आनी आपली आंगवण पावयतात. क्रिस्तांव भावां सयत हिंदू आनी हेर धर्मांतलो लोक ह्या फेस्तांत वांटो घेतात, हे खातीर ह्या फेस्ताक आगळें म्हत्व फावो जालां.
मिलाग्रीस सायबीण ही लयराई देवीची भयण
मिलाग्रीस सायबीण ही शिरगांवचे श्री लयराई देवीची भयण म्हूण वळखतात. श्री लयराई देवीची जात्रा 2 मेक जाली. शिरगांव सावन मिलाग्रीस सायबिणीक तेल जाल्यार म्हापशें सावन देवी लयराईक फुलां भेटोवपाची परंपरा आसा. ही परंपरा कितल्याश्याच वर्सां सावन अखंडपणान चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
