भांगरभूंय | प्रतिनिधी
म्हापशें: म्हापशेंच्या श्री बोडगेश्वर देवस्थानांतली देवाच्या पादुकांची पेटी चोरांनी फोडिल्ल्यान खूब बोवाळ जाल्लो. ह्या प्रकरणांत म्हापशें पुलिसांनी रोखडीच तपासचक्रां गतीमान करून फक्त कांय वरां भितर सागर हरिश्चंद्र शिंदे (40. मूळ रावपी उत्तर विजापूर कर्नाटक) आनी आनंद शिवाजी नाईक (40. मूळ रावपी उत्तर हट्टागरी बेळगावी) ह्या बोडगिणी म्हापश्यां रावपी दुबावितांक धरले.
बुधवारा फांतोडेर 4.30 वरांचेर ही चोरी जाली. त्या वेळार सुरक्षारक्षक देवळांत न्हिदिल्लो तेन्ना वयले दोगूय दुबावीत देवळाच्या प्राकारांत आयले. देवा मुखार दवरिल्ले पादुका तशेंच दानपेटींत भावीत ह्या पादुकांचेर देणगी म्हूण पयशे ओंपताले. ह्या पयशांनी ती पेटी भरिल्ली. दुबावितांनी ते पयशे काडपाचो यत्न केलो. पेटयेर आशिल्लो हारसो तांणी दांड्यान फोडलो. ताका लागून व्हड आवाज जालो. ह्या आवाजान सुरक्षा रक्षक दशरथ ठाकूर जागो जालो. ताणें बोवाळ मारीत पेटये कडेन धांव मारली. ह्या बोवळांत दुबावीत दांडो थंयच उडोवन हाताक मेळत तितले पयशे घेवन देवळाच्या उजवे वटेंतल्यान पळून गेले. फाटलाव करून लेगीत ते दुबावीत सुरक्षा रक्षकाक मेळूंक ना.
सुरक्षारक्षकान उपरांत ही म्हायती म्हापशें पुलीस आनी देवस्थान समितीक दिली. म्हायती मेळटाच पुलीस तत्काळ घडणुकेचे सुवातेर दाखल जाले आनी तांणी पंचनामो करून तपासाचीं चक्रां गतीमान केलीं. हो चोरयेचो प्रकार देवळाचे सीसीटीव्ही फुटेजींत बंदिस्त जाल्लो.
पुलिसांनी चवकशी करून भोंवतणच्या वाठाराची झडटी घेतली. तेन्ना देवळा पासून एक- दोन किलोमिटर अंतराचेर पुलीस पंगडाक दोगांक दुबावा वयल्यान ताब्यांत घेतले. पुलीस स्टेशनार हाडून तांची चवकशी केली तेन्ना तांणी गुन्यांवाची कबुली दिली.
सुरक्षारक्षक दशरथ ठाकूर हांचे कागाळे वयल्यान पुलिसांनी दुबाविता आड गुन्यांव नोंद केलो आनी तांकां अटक केली. पुलीस निरिक्षक निखील पालेंकार हांच्या मार्गदर्शना खाला उपनिरिक्षक विराज कोरगांवकार, हवालदार सुशांत चोपडेंकार, उल्हास गांवकार, कॉन्स्टेबल आनंद राठोड आनी नितेश नायक ह्या पंगडान ही कामगिरी केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
