भांगरभूंय | प्रतिनिधी
हजारांनी रुपयांचे कपडे आनी वीज उपकरणाचो गोबर
भांगरभूंय । प्रतिनिधी
म्हापशें : म्हपशें बाजारांतल्या मेसर्स मालसन्स शूज दुकानाचो भाग आशिल्ल्या डिलक्स कलेक्शन मॅन्स अॅण्ज किड्स वेअर ह्या दुकानाक उजो लागून हजारांनी रुपयांचें लुकसाण जालें. म्हापशें उजो पालोवपी दळान वेळार उजो नियंत्रणांत हाडिल्ल्यान व्हड दुर्घटणां टळ्ळी.
शॉर्ट सर्कीटाक लागून हो उजो लागला आसूं येता असो दुबाव उजो पालोवपी दळान उक्तायला जाल्यार हो दुबाव दुकान धनयान न्हयकारला.
उजो लागपाची ही घडणूक बुधवारा 3 सप्टेंबराक दनपारां 12.25 वरांच्या सुमाराक घडली. दुकानाच्या पोटमाळ्या वयल्यान धुंवर येता हें कळटाच कामगारांनी दुकाना भायर धांव मारली आनी उजो पालोवपी दळाक आपयलो. दळाचे जवान घडणुकेचे सुवातेर पावता म्हणसर दुकानांतल्या कर्मचाऱ्यांनी कांय सामान दुकाना भायर सुरक्षीत सुवातेर हालयलें.
दुर्घटणेची गंभीरता पळोवन मजती खातीर पिळर्ण आनी पर्वरी उजो पालोवपी दळाच्या जवानांक मजती खातीर म्हापशें उजो पालोवपी दळान आपयल्ले. पूण ह्या दोनूय केंद्रा वयले जवान घडणुकेचे सुवातेर पावचे आदींच उजो नियंत्रणांत हाडिल्लो. मजगतीं, बाजारांतल्या प्रवेश दरवट्यार दोनूय वटांनी गाडयो पार्क केल्ल्यान बंबाक दुर्घटणा जाल्ले सुवातेर वचपाक आडखळ जाली. दळाच्या जवानांनी गाडयो कुशीक काडून बंब दुकाना मेरेन व्हेलो आनी मजत वावराक सुरवात केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
