भांगरभूंय | प्रतिनिधी
गोवा कॅनाक हुस्को; येरादारी खात्या कडेन कागाळ
भांगरभूंय । प्रतिनिधी
म्हापशें: म्हापशेंच्या कदंब बसस्टॅण्डाच्या प्लॅटफॉर्मार नेम मोडून आनी अतिक्रमण करून एक दुकान घातलां. तें मोडिनासतना तातूंत वेवसाय सुरू करपाचे नदरेन इंटेरियराचें काम सुरू आशिल्ल्यान गोवा कॅनान हुस्को उक्तायला. येरादारी खात्यान तें दुकन ताकतिकेन थंयच्यान काडचें, अशी तांणी मागणी केल्या.
गोवा कॅनान येरादारी खात्याचे प्रशासकीय उपसंचालक नॅन्सी फर्नांडीस हांणी हें पत्र दिवन ह्या प्रकारा कडेन लक्ष दिवचें, अशी विनवणी केल्या.
फाटल्या दिसांनी ह्या बसस्टॅण्डाची पळोवणी केल्ली. त्या वेळार हें अतिक्रमण सुरू आशिल्ल्याचें उत्तर गोंय जिल्हो रस्तो सुरक्षा समितीक दिशिल्लें. हे विशीं जिल्होघिकाऱ्यां कडेन चर्चा केल्ली. त्या वेळार तें दुकान मोडून ती सुवात परतून आदले वरी करतले, अशें उतर कदंब म्हामंडळान दिल्लें. तरी लेगीत ह्या बसस्टॅण्डाचेर कांय किरकोळ वेवसायीक हितसंबंद सांबाळचे खातीर येरादारी संचालक आनी जिल्होधिकाऱ्यांचे सुचोवणे कडेन आडनदर करतात, हे खातीर गोवा कॅनान नाराजी उक्तायल्या.
कदंबा येरादारी म्हामंडळाचे वेवस्थापकीय संचालक डेरीक परेरा नेटो हांकां हें बांदकाम मोडून ती सुवात आदले वरी करपाचो आदेश दिल्लो, पूण सध्या ह्या दुकानांत वेवसाय सुरू करपाचे नदरेन तीन शटारांक रंग मारून भितरलें इंटेरियराचें काम नेटान चालू आसा. म्हापशें कदंबा बसस्टॅण्डाचेर कसलीय वायट घडणूक घडचे आदीं भौशीक सुरक्षेच्या हिता खातीर ह्या दुकानाचें काम बंद करून तें मातये भरवण करपाचें काम हातांत घेवचें. तशेंच प्रवाशांक बसपा खातीर आशिल्ल्यो बसका घालून ती सुवात आदले वरी करची, असो उलो गोवा कॅना वतीन समन्वयक रोलंड मार्टीन्स हांणी येरादारी खात्याक मारला. गोवा कॅनान त्या पत्र्याच्यो प्रती मुख्य सचीव, येरादारी सचीव, उत्तर गोंय जिल्होधिकारी, उजो पालोवपी दळाचे संचालक, पालिका प्रशासन, नागरी पुरवण आनी गिरायक वेव्हार, येरादारी खात्याचे अंमलबजावणी सहाय्यक संचालक, तशेंच येरादारी पुलीस अधिक्षकांक धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
