भांगरभूंय | प्रतिनिधी
म्हापशें: भारताची 14 ऑगस्ट 1947 ह्या दिसा फाळणी जाल्ली. त्या वेळार विवीध समाजांतल्या लोकांक त्रासांत फुडो करचो पडिल्लो. आयचो हो दीस फाळणीच्या घाव्यांक उगडास करपाचो दीस, म्हूण पाळटात. वट्ट 52 म्हायतीपूर्ण चित्रांच्या माध्यमांतल्यान जनजागृती करपाचो हो प्रदर्शना वरवीं यत्न केला, अशें पर्यटन मंत्री रोहन खंवटे हांणी सांगलें.
म्हापश्यां बसस्टॅण्डाचेर सरकारा वतीन देशाच्या फाळणीक लागून बाधीत जाल्ल्या लोकांचें दुख्ख मांडपी फाळणीचे भिशणतेचेर प्रदर्शन मांडलां. ह्या प्रदर्शनाचें उक्तावण मंत्री खंवटे हांणी केलें. ह्या वेळार उपसभापती ज्योशुआ डिसोझा आनी म्हायती आनी प्रसिद्धी संचालक दीपक बांदेकार हाजीर आशिल्ले.
राज्यसभा खासदार विनय तेंडुलकार हांचे वांगडा भाजपाचे सचीव दामू नायक आनी नगराध्यक्ष शुभांगी वायंगणकार हांणी प्रदर्शनाक भेट दिली. उपसभापती डिसोझा हांणी सांगलें, ह्या प्रदर्शनाच्या माध्यमांतल्यान त्रासदिण्या इतिहासाची व्यापक म्हायती दिल्या. भूतकाळांत कितें घडिल्लें हें प्रदर्शनांत मांडलां. फुडारांत परतून अश्यो घडणुको घडच्यो न्हय हाचो बोध हातूंतल्यान घेवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
