भांगरभूंय | प्रतिनिधी
म्हापशें: धारगळे काल जाल्लो तो पयलोच अॅसीड हल्लो न्हय, तर ह्यान पयलीं बार्देस म्हालांत चार अॅसीड हल्ले जाल्ले. गिरी पांयवाटेच्या वादांतल्यान, आदले दुस्मानकायेन, म्हापश्यां घरांतलो वाद आनी वैयक्तीक राग ह्या कारणांवेल्यान ह्यो घडणुको घडल्यात.
जून २०१६ वर्सा गिरी वाठारांत धारगळकार कुटुंबियांचेर उक्त्या जनेलांतल्यान अॅसीड हल्लो केल्लो. ह्या हल्ल्यांत चिन्मया धारगळकार (१६) हे नेण्टे चलये वांगडा तिची आजीय जखमी जाल्लीं. धारगळकार आनी गांवस कुटुंबांतले पांय वाटेच्या वादांतल्या हो हल्लो जाल्लो. ह्या प्रकरणांत कागाळदार मोतीराम धारगळकार हांचे कागाळीच्या आदारार म्हापशें पुलिसांनी नारायण गांवस आनी सनीत देसाय ह्या दोगांक अटक केल्ली.
दुसरी घडणूक डिसेंबर २०१९ वर्सा म्हापश्यां बाजारांत कुटूंबीक वादांतल्यान पुतणयेचेरूच अॅसीड उडयिल्ल्याची घडणूक घडिल्ली. ह्या प्रकरणांत दुबावीत यशवंत गुरूदास पेडणेंकार (बस्तोडा) हाका अटक केल्ली. ह्या हल्ल्यांत कागाळदार विशाखा वासुदेव पेडणेंकार ही जखमी जाल्ली. पुलिसांनी दिल्ले म्हायतीप्रमाण, सदांच दुकानाचेर येवन वायट उतरां दिवपी काकाक तिणें घडणुके वेळार जाब विचारिल्लो. ह्या रागांतल्यान दुबावितान अॅसीड हाडलें आनी पुतणी विशाखाचेर मारलें. तिणें प्रसंग वळखून दुकानाचें हारश्याचें दार बंद केलें. मात तो मेरेन तिच्या हातार, तोंडार अॅसीड पडून ती जखमी जाल्ली.
तिसरी घडणूक नोव्हेंबर २०२० वर्सा आल्तो धुळेरांत घडिल्ली. अनवळख्यान कागाळदार सुदेश हसोटीकार हांचे स्कुटरीचेर अॅसीड हल्लो करून ती लासून उडोवपाचो यत्न केल्लो. घरा लागसार पार्क केल्ल्या हसोटीकर हांचे स्कुटरीचेर ऍसिड आनी हेर रसायनीक द्रव्य घातिल्लें. हे विशीं म्हापशें पुलिशेंत तांणी कागाळ नोंद केल्ली.
ताचे पयलीं १९९० च्या उत्तरार्धांत अंगना शिरोडकार हे शिक्षिकेचेर म्हापश्यां अॅसिड मारिल्लें. ती मूळ बोरयेची. तिका उपरांत मरण आयिल्लें. ह्या प्रकरणांत एका राजकी फुडाऱ्याचीं घरचीं घुस्पल्यात, असो आरोप लोकांनी केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
