भांगरभूंय | प्रतिनिधी
म्हापशें: म्हापशें बाजारांत कोयर वर्गिकरण करतना मि(त कोयर उडोवन पालिका कर्मचाऱ्यांक मारपेट करपाचो यत्न एका भाजी विक्रेत्यान केला. ह्या प्रकरणांत पालिका कर्मचाऱ्यांनी म्हापशें पुलिशेंत दुबावीत सादीक हुलगेरी ह्या भाजी विक्रेत्या आड कागाळ दाखल केल्या. सगळे पालिका कर्मचारी पुलीस स्टेशनार एकठांय जाल्ल्यान कांय वेळ शारांतलो कोयर काडपाचें काम बंद जाल्लें.
ही घडणूक बिरेस्तारा सकाळीं 9.30 वरांच्या सुमाराक घडली. म्हापशें भाजी मार्केटा कुशीक एकठांय केल्ल्या कोयराचे पालिका कर्मचारी वर्गिकरण करताले. ह्या वेळार दुबावीत सादीक हुलगेरी ह्या भाजी विक्रेत्यान थंय मिश्रीत कोयर हाडून उडयलो. हो कोयर फिर्यादी धुडाप्पा नसरकर आनी विश्वनाथ विरवाडकर ह्या पालिका कामगारांच्या हातांचेर पडलो. ते खातीर तांणी दुबाविताक जाब विचारलो आनी मिश्रीत कोयर वेगळो करपाची सुचोवणी केली. ताचेर दुबावितान ह्या कामगारां कडेन वाद घातलो, तशेंच फिर्यादी धुडाप्पा नेसरकर हाचेर भाजयेच्या तबकान (ट्रे) जाल्यार विश्वनाथ बिरवाडकर हाचेर खोऱ्यान हल्लो करपाचो यत्न केलो.
हो हल्लो ह्या कामगारांनी आडायलो. ते उपरांत दुबावितान महेश पिरणकार, शेखर दुपदाळे, विश्वास पवार, नामदेव कांबळी ह्या सांगाती पालिका कर्मचाऱ्यांक गाळी संवल्यो. उपरांत पालिका कामगारांनी पालिका अधिकाऱ्यांच्या सल्ल्या वयल्यान पुलीस स्टेशनार धांव घेतली आनी कागाळ दाखल केली. पळून गेल्लो दुबावीत सांजे मेरेन पुलिसांक मेळूंक नाशिल्लो. मजगतीं, हे घडणुके उपरांत पालिका नितळसाण कामगारांनी कोयर एकठांय करपाचें काम बंद केलें आनी सगळे कामगार पुलीस स्टेशनार एकठांय जाले. पुलिशेंत कागाळ दाखल केले उपरांत कांय कामगारांचे मजतीन हें काम परतून सुरू केलें. तशेंच पालिका अधिकाऱ्यांनी ह्या प्रकरणाची दखल घेतले उपरांत सांजेच्या आदेसाक कोयर एकठांय करपाचें काम आदले वरी परतून चालू जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
