भांगरभूंय | प्रतिनिधी
प्रदुशण नियंत्रण मंडळाच्या आदेशाची कार्यवाही
म्हापशें: अलंकार थिएटर वाठारांतल्या गोंय राज्य प्रदुशण मंडळा कडल्यान गरजेचो परवानो घेवंक नाशिल्ल्या पांच फास्टफूड तशेंच खाद्य पदार्थ विक्री गाळे उपजिल्होधिकाऱ्यांच्या निर्देशा प्रमाण मामलेदार कचेरे कडल्यान सील केले.
सील केल्ल्या पांच आस्थापनां मदीं मेसर्स फूड फुजन फास्ट फूड, मेसर्स असगर अली शेख, मेसर्स मामास् कोल्ड ड्रींक अॅण्ड फास्ट फूड, मेसर्स पापास् फूड कॉर्नर आनी मेसर्स केणी कोल्ड ड्रींक हांचो आस्पाव आसा.
कांय म्हयन्यां पयलीं गोंय राज्य प्रदुशण नियंत्रण मंडळान केल्ल्या सर्वेक्षणांत म्हापशें शारांतल्या खूबशा खाद्य विक्री चड करून फास्टफूड आनी रॅस्टोरंण्ट वेवसायीक मंडळाचो गरजेचो तो परवानो घेनासतना वेवसाय चलयत आशिल्ल्याचें दिसून आयिल्लें.
ते प्रमाण प्रदुशण मंडळान संबंदीत आस्थापनांक कारणां दाखय नोटीस दिल्ली. तरी लेगीत मंडळाच्या नेमांक पाळो दिवंक नाशिल्ल्यान संबंदीत आस्थापनां बेकायदो थारावन ती सील करपाची कारवाय करून अहवाल सादर करपाचे निर्देश बार्देस उपजिल्होधिकाऱ्यांनी मंडळाक दिल्ले.
उपरांत उपजिल्होधिकाऱ्यांनी बार्देस मामलेदारांक प्रदुशण नियंत्रण मंडळाच्या आदेशाच्या कार्यवाही करपाचो आदेश दिल्लो. ते प्रमाण मंगळारा 28 वेर दनपारां मामलेदार कचेरे वतीन तलाठ्यांनी वयल्या सगल्या आस्थापनांक नोटीस दिवन सील मारलें.
गोंय राज्य प्रदुशण नियंत्रण मंडळाचो परवानो घेनासतना वेवसाय करपी म्हापशें शारांतल्या खूबशा आस्थापनांक मंडळान कारणां दाखय नोटिसी दिल्ल्यो. तशेंच सदर आस्थापनां सील करपाचे निर्देश दिल्ले. हाची कार्यवाही आतां उपजिल्होधिकाऱ्यां कडल्यान जायत आसा अशें गोंय राज्य प्रदुशण नियंत्रण मंडळाचे चेरमन महेश पाटील हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
