भांगरभूंय | प्रतिनिधी
म्हापशें : म्हापशें नुस्त्या मार्केट वाठारांत नुस्तें उजरावप्यांक आपले वांगडा मजत करपी दवरपाक परवानगी दिल्या. तशेंच नळ जोडणीची वेवस्ता करून दिवपाचें आस्वासन पालिका अधिकाऱ्यांनी नुस्तें उजरावप्यांक दिलां.
हालींच म्हापशें पालिकेन नुस्त्या मार्केटांतल्या नुस्तें उजरावप्यांक मजत करपी दवरपाक मनाय केल्ली. पालिकेन तसो संबंदितांक निर्देश दिल्लो. कारण कांय जाण आपणें मजत करपाक दवरिल्ल्या मनशाक मार्केटांत धाडून गिरायका कडल्यान नुस्तें उजरावपा खातीर हाडटाले. ताका लागून कांय जाणांक वेवसाय जायना म्हूण तांणी पालिका अधिकाऱ्यां कडेन कागाळ केल्ली. तशेंच थंय जावपी बुरश्यापणाचो मुद्दो लेगीत पालिकेन उपस्थीत केल्लो.
पालिकेच्या ह्या निर्णयाक लागून फाटल्या 15 दिसां सावन नुस्तें उजरावप्यांक तशेंच गिरायकांक लेगीत त्रास सोंसचो पडटालो. कारण नुस्तें उजरावपाक वेळ लागतालो. हे खातीर गिरायकांक ल्हान नुस्तें उजरावन दिनाशिल्ले.
नुस्तें विक्रेता संघटणेची अध्यक्ष शशीकला गोवेकार हांच्या फुडारपणा खाला नुस्तें उजरावप्यांच्या शिश्टमंडळान पालिका कार्यालयांत पालिका अधिकारी, नगराध्यक्ष तशेंच आमदाराची भेट घेतली आनी आपल्यो समस्या मांडल्यो. चर्चे उपरांत गिरायकांची गैरसोय जावची न्हय हे खातीर समस्येचेर उपाय काडपाचो निर्णय पालिकेन घेतलो. मजत करपी दवरप, दिल्ल्या नळ कनेक्शनाचें उदकाचें बील नुस्तें उजरावप्यांनी भरचें आनी मार्केटाच्या वाठारांत नितळसाण राखची, अश्यो सुचोवण्यो नुस्तें उजरावप्यांक दिल्यो. आमी आमच्यो समस्या आमदार आनी पालिका अधिकाऱ्यां मुखार मांडल्यो. ताचेर उपाय काडटले, अशें आस्वासन दिलां. आमकां नितळसाण दवरपाक सांगल्या. स्वतंत्र निळ कनेक्शन दिवपाचेंय आस्वासन दिलां, अशें नुस्तें उजरावप्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
