भांगरभूंय | प्रतिनिधी
म्हापशेंः रेन्ट अ बायक वेवसायीक वादांतल्यान जाल्ले मारपेटींत एकल्याक चाबून ताच्या कानाचो कुडको काडिल्ल्याची घडणूक म्हापश्यां घडली. हे घडणुकेंत जखमी जाल्लो नितेश दत्ताराम खानोलकार (४३, रा. सांताक्रूज वाडो, बस्तोड्यां) हाचेर गोमेकॉंत उपचार सुरू आसात. जाल्यार दुबावीत समीर पेडणेंकर (रा. खोर्ली, म्हापशें) हाका पुलिसांनी अटक केल्या.
ही घडणूक मंगळारा ता. ३० डिसेंबराक रातच्या सुमार ८.१५ वरांचेर म्हापशेंच्या कदंब बस स्टॅण्डार घडली. ह्या प्रकरणांत जखमीचे भाव नरेश हांणी पुलिशेंत कागाळ केली. जखमी आनी दुबावीत हांचो रेन्ट अ बायक भाड्यान दिवपाचो वेवसाय आसा. ते दोगूय म्हापशेंच्या नव्या कदंब बस स्टॅण्डारच्या वाठारांत हो वेवसाय करतात.
पुलिसांनी दिल्ले म्हायतीप्रमाण, जखमी नितेश हे बस्तोड्यां, जाल्यार दुबावीत समीर हो म्हापश्यां रावता. आपूण म्हापश्यां रावपी आशिल्ल्यान हांगा आमकांच वेवसाय करपाक मेळपाक जाय, अशें सांगिल्ल्यान त्या दोगांय मदीं वाद जाता. असोच वाद जावन प्रकरण मारामारी मेरेन पावलें. मारामारी वेळार दुबावीत पेडणेंकारान खानोलकाराच्या कानाक घांस मारलो. हातूंत जखमीच्या कानाचो कुडको तुटून दुबाविताच्या तोंडांत आयलो. उपरांत जखमीच्या कानांतल्यान रगत येवपाक लागलें. ताका ऍम्बुलन्सींतल्यान म्हापशें जिल्लो हॉस्पिटलांतलांत दाखल केलो. थंयच्यान ताका गोमॅकोंत धाडलो. थंय आतां ताचेर उपचार सुरू आसात.
ह्या प्रकरणांत म्हापशें पुलिसांनी गुन्यांव दाखल केला आनी दुबाविताक अटक केली. बुधवारा ३१ तारखेर दुबाविताक म्हापशें न्यायालयान पांच दीस पुलीस बंदखणींत दवरपाचो आदेश दिला. फुडलो तपास पुलीस निरीक्षक नवीन देसाय हांच्या मार्गदर्शनाखाला उपनिरीक्षक पंढरी चोपडेंकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
