भांगरभूंय | प्रतिनिधी
म्हापशें : म्हापशेंच्या वामन सदन इमारतींतलें सेलटावन रबर स्टॅम्प दुकान चोरान आयज सकाळीं फोडलें. फ्लॅश मशीन, लॅमिनेशन मशीन आनी हेर सामान मेळून वट्ट २ लाखांचो माल चोरलो. ह्या प्रकरणांत म्हापशें पुलिसांनी एका दुबाविताक ताब्यांत घेतला.
म्हापशेंच्या सूरज बुक स्टॉलाच्या शेजरा आशिल्लें हें दुकान आयतारा ३१ तारखेर सकाळीं ९.२० वरांचेर फोडलें. चोरान दुकानाच्या दारावेलें कुलूप फातर घालून मोडलें आनी भितर प्रवेश केलो. भितरलें फ्लॅश मशीन, लॅमिनेशन मशीन, कॉम्प्युटरचा मॉनिटर, सील मशीन आनी स्टेबलायझर ह्यो वस्तू चोरून व्हेल्यो. ही चोरी दुकाना भायर आशिल्ल्या कॅमेर्यांत कैद जाली.
सकाळीं १ वरांचेर घरांतल्यान सकयल आयले उपरांत दुकानाचे धनी अंकुश वेर्णेकार हांकां हो चोरयेचो प्रकार समजलो. उपरांत तांणी रोखडीच पुलिशेंत कागाळ केली. चोरयेची म्हायती मेळटाच पुलीस ते सुवातेर पावले.
मजगतीं, ह्या प्रकरणांत चोरयेच्या दुबावा खाला एकल्याक पुलिसांनी ताब्यांत घेतलो. पुलीस ताची चवकशी करतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
