भांगरभूंय | प्रतिनिधी
एके बायलेक अटक; जाल्यार 3 बायलो फरार
म्हापशें: फेराआल्त, म्हापश्यां रस्त्या वेलो कोयर तशेंच कावल एकठांय करपाचें निमित्त करून एका घरांत घुसून पुर्विल्ल्यो वस्तू चोरपाचो चार बायलांनी दिसा उजवाडा यत्न केलो. ह्या घरांतल्या कुटुंबांतल्या वांगड्यांनी प्रतिकार करून हो चोरयेचो यत्न फळादीक जावंक दिलो ना. एके बायलेक रंगेहात धरलो. जाल्यार हेर बायलो पळून वचपाक येसस्वी थारल्यो. म्हापशें पुलिसांनी दुबावीत बायलेक अटक केल्या.
काल (मंगळारा) सांजवेळा ही घडणूक घडली. फेराआल्त, म्हापश्यां घरांत कोणूच नाशिल्ल्याची संद सादून दुबावीत बायलो चोरयेच्या उद्देशान घरांत घुसपाचो यत्न केलो. त्यो कोयर तशेंच कावल वेंचीत घडणूक थळार पाविल्ल्यो.
घरांत कोण तरी भितर सरिल्ल्याची सुलूस लागतकच घरचे फाटले वटेन आशिल्ल्या कागाळदार कुटुंबाच्या दादल्यान मुखा वेले दिशेन धांव घेतली. तेन्ना चार अनवळखी बायलो घरांत घुसल्यात आनी त्यो घरांतल्यो पुर्विल्ल्यो वस्तू चोरपाचो यत्न करीत आशिल्ल्याचें ताचे नदरेक आयलें.
उपरांत तांणी शिताफीन एका दुबावीत बायलेक रंगेहात धरलो. जाल्यार हेर तिगां बायलांनी घडणूक थळा वेल्यान पळ काडलो. दुबावीत बायलेच्या हातांत स्क्रुड्रायव्हर (पेंचकस) आशिल्लो आनी ताणें आपलो चेरो कपड्यान धांपिल्लो.
मजगतीं, घरांतल्यान कसल्योच मोलादीक वस्तू चोरयेक वचूंक नाशिल्ल्याचें संबंदीत कुटुंबाक समजलें. पुलीस फरार दुबावीत बायलांचो सोद घेतात. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
