भांगरभूंय | प्रतिनिधी
रान खात्या कडल्यान 47 गारांचीं चामडीं, 14 घुमटां जप्त
भांगरभूंय । प्रतिनिधी
म्हापशें : कुमारवाडो, शेळपें- धुळेरांत रान खात्यान धाड घालून गारांच्या चामड्यां पासून तयार केल्लीं परंपरीक 14 घुमटां आनी 47 गारांचीं चामडीं जप्त केलीं. ह्या प्रकरणांत घुमट कारागीर गॅब्रियल सिक्वेरा हाका अटक केली.
मंगळारा 5 ऑगस्टाक दनपारां रान खात्याचे अधिकारी मंगलदास देवसेकार हाच्या फुडारपणा खाला संदीप मांद्रेंकार, प्रथमेश तारी, स्वाती शिरोडकार आनी साईनाथ शिरोडकार हांच्या पंगडान ही कामगिरी केली. जाल्यार बुधवारा 6 ऑगस्टाक सांजे वेळार म्हापशें न्यायालयान दुबावीत गॅब्रियल सिक्वेरा हाची 10 हजार रुपयांची हमी रकमेचेर जामिनाचेर सुटका केली. रान खात्यान दुबाविता आड रानवटी जीव संरक्षण कायदो 1972 खाला कलम 9 आनी 39 प्रमाण गुन्यांव नोंद केलो. जप्त केल्ल्या साहित्याचें मोल 30 हजार रुपया आसा.
घडणुकेचे सुवातेर रानवटी जिवांच्या चामड्यां पासून घुमटां तयार करतात अशी म्हायती रान खात्याक मेळिल्ली. हे म्हायतीच्या आदारान रान अधिकाऱ्यांनी धाड घातली तेन्ना घुमटां करपाचें काम चालू आशिल्लें. मजगतीं, रान अधिकाऱ्यांनी दिल्ले म्हायती प्रमाण दुबावीत गॅब्रियल सिक्वेरा हाचेर 15 वर्सां आदीं अशेच तरेचो गुन्यांव दाखल केल्लो. तेन्ना ताचे कडलीं 960 घुमटां जप्त केल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
