भांगरभूंय | प्रतिनिधी
म्हापशें ः डांगी कॉलनी, म्हापशेंच्या रसिका तेंडुलकार हांच्या घराक लागिल्ल्या उज्यांत दोन बिराडां हुलपून गोबर जालीं. हे घडणुकेंत १ लाखांचें लुकसाण जालें.
ही घडणूक बिरेस्तारा १९ तारखेर रातीं सुमार ९.४५ वरांचर घडली. तेंडुलकार हांणी घरा फाटल्यान दोन कुडींनी बिराडकार दवरिल्ले. हे घडणुके पयलीं ते कुडींत रावपी कुटुंबां कुडी बंद करून सोयर्यांच्या वाडदिसाक गेल्लीं. ताचे उपरांत हो उजो लागलो. उज्यांत कुडींतलें सामान हुलपलें. उजो पालोवपी दळाच्या जवानांनी सुरवातेक तीन गॅस सिलिंडर प्रसंग वळखून भायर काडले. तांतल्या दोन सिलिंडरांक उजो लागिल्लो. उपरांत जवानांनी उदक मारून उजो नियंत्रणांत हाडलो. ताका लागून घराची हेर मालमत्ता उज्याच्या धगा पसून वाटवली.
म्हापशें उजो पालोवपी दळाचे हवालदार सुरज शेटगांवकार, जयेश कळंगुटकार, जितेंद्र नायक, अशोक वळवयकार, आकाश कळंगुटकार, तशेंच पर्वरी दळाचे हवालदार सलिम शेख, ईप्रिमो डायस, विकास मोरजकार, महेंद्र नायक, रोहन नायक आनी आर. आर. सावंत ह्या जवानांनी येवन हो उजो पालयलो. म्हापशें पुलीस हवालदार उल्हास गांवकार हांणी घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
