भांगरभूंय | प्रतिनिधी
निमाणे कडेन बायलेन माफी मागिल्ल्यान प्रकरणाचेर पड्डो
भांगरभूंय । प्रतिनिधी
म्हापशें : म्हापशेंच्या एकतानगर हावसींग बोर्डांत ईद- ए- मिलाद निमतान केल्ले विद्यूत रोशणाये वयल्यान एके हिंदू बायलेन मुस्लीम धर्मांतल्या लोकांक गांळ मारून अपमान करपी भास वापरली. ह्या प्रकारा वयल्यान दोन धर्मीक समाजा मदीं वाद निर्माण जालो आनी वाड्याचेर तशेंच म्हापशें शारांत सुवेवस्थेचो प्रस्न निर्माण जालो. म्हापशें पुलिसांनी वेळार हस्तक्षेप केले उपरांत ते बायलेन माफी मागिल्ल्यान ह्या प्रकरणाचेर पड्डो पडलो.
आयतारा 7 सप्टेंबराक दनपारां ही घडणूक घडली. मेळिल्ले म्हायती प्रमाण ईद- ए- मिलाद निमतान मुस्लीम धर्माचे एके मशीद समितीन एकतानगरांत विद्यूत रोशणाय करून तकटे लायिल्ले. हे विद्यूत रोशणाये वयल्यान फाटल्या तीन- चार दिसां सावन संबंदीत हिंदू बायल आनी मुस्लीम लोकां मदीं वाद चलिल्लो. हे विद्यूत रोशणाये खातीर आमी संबंदीत प्राधिकरणाची रितसर परवानगी घेतल्या. तरी लेगीत ती बायल आमकां विद्यूत रोशणाये वयल्यान थोमणें आनी अपमान करपी उतरां वापरून गाळी मारताली. ताका लागून आमी पुलिशेंत रितसर कागाळ केल्ली, अशें समितीच्या वांगड्यांनी सांगलें.
विद्यूत रोशणाये खातीर वापरिल्लें साहित्य काडटना आयतारा दनपारां हो वाद चडार पडलो. संबंदीत जमावान दुबावीत बायलेच्या घरा भायर एकठांय जावन ते बायलेक अटक करची अशी मागणी केली. जमावान गर्दी केल्ल्यान घडणुकेचे सुवातेर तणावाचें वातावरण निर्माण जालें. घडणुकेची म्हायती मेळटाच म्हापशें पुलीस घडणुकेचे सुवातेर पावले.
दुबावीत बायलेक ताब्यांत घेवची आनी पुलिशेचे गाडयेंतल्यान तिका पुलीस स्टेशनार व्हरची तशेंच तिचेर कायदेशीर कारवाय करची, अशी मागणी आंदोलक जमावान लावन धरली. पुलिसांनी ते बायलेक तिचे खाजगी गाडयेंतल्यान पुलीस स्टेशनाचेर व्हरपाचो यत्न केलो, तेन्ना ते बायलेक पुलिशेचेच गाडयेंतल्यान व्हरची, असो हट्ट जमावान धरलो. ताका लागून कांय वेळ जमाव आनी पुलिसां मदीं वाद जालो.
जमावाचो वाडटो विरोध पळोवन पुलिसांनी निमाणे कडेन पिंक- फोर्स गाडयेंतल्यान तिका पुलीस स्टेशनार हाडली. जमाव लेगीत फाटोफाट पुलीस स्टेशनाचेर जमलो. ह्या वेळार पुलिसांनी पुलीस स्टेशनाची मुख्य गेट बंद करून जमावाक गेटी भायर आडावन धरलो. पुलीस निरिक्षक निखील पालेकार हांचे शिश्टयेक लागून अखेर ते बायलेन मुस्लीम समुदायाच्या शिश्टमंडळा मुखार तोंडी माफी मागली आनी ह्या प्रकरणाचेर पड्डो पडलो.
सुमार चार वरां दोन गटांत संघर्श चलिल्ल्यान एकतानगर तशेंच म्हपशें पुलीस स्टेशना भायर तणावाचें वातावरण निर्माण जाल्लें. पुलिसांनी वेळार हस्तक्षेप केल्ल्यान हो वाद चड वाडलो ना.
मजगतीं पुलीस आनी हेरांनी मध्यस्थी करून मुस्लीम भावांक समजायलें आनी वातावरण शांत जालें. तशेंच पुलिसांनी दुबावीत बायले कडल्यान लेखी हमीपत्र घेतलें आनी तिकाय सोडून दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
