भांगरभूंय | प्रतिनिधी
नवो कंत्राटदारूय सरलो फाटीं; दीसपट्टी जाता येरादारेची कोंयडी
भांगरभूंय । प्रतिनिधी
म्हापशें: म्हापश्यां कोर्ट जंक्शनाचेर चार म्हयन्यां सावन अदीक काळ येरादारी सिग्नल बंद आसा. ताका लागून येरादारीची व्हड समस्या निर्माण जाल्या. नवें सिग्नल अजून लेगीत चलना. तातूंत तो कंत्राटदार सिग्नलाच्या कामांतल्यान फाटीं सरला. हे खातीर येरादारी सिग्नलाची समस्या घुस्पागोंदळाची जाल्या.
ह्या जंक्शना वयल्यान दीसभर व्हड प्रमाणांत येरादारी चलता. शारांतलें हें मुख्य जंक्शन येरादारी कोंयडीमुक्त जावचें, ह्या उद्देशान पालिकेन थंय येरादारी सिग्नल बसयिल्लें. ह्या जंक्शना वयल्यान व्हड प्रमाणांत येरादारी जायत आशिल्ल्यान येरादारी पुलिशेक येरादारी सुरळीत करचे खातीर व्हड कश्ट करचे पडटात.
म्हापशें पालिकेन 2018 त वेवसायीक समाजीक जापसालदारकी (सीएसआर) येवजणे खाला स्वयंचलीत येरादारी सिग्नल बरयिल्लें. पूण ताची योग्य देखरेख जावंक नाशिल्ल्यान अडचणी वाडपाक लागल्यो. सुमार एका वर्सा सावन ते सारकें चलानाशिल्लें. ताका लागून वाहनचालक आनी रस्त्या वयल्यान चलत वचपी लोगांचो गोंदळ जातालो.
सुरवेक आदल्या कंत्राटदारान सिग्नलाचें वीज बील भरूंक नाशिल्ल्यान नवें येरादारी सिग्नल बसोवपाक आडखळी आयिल्ल्यो. सध्या नवें सिग्नल बसोवपाच्या कामाक कळाव जाल्ल्यान प्रवाशी आनी वाहनचालकांक दिसपट्टो व्हड समस्यांक फुडो करचो पडटा. येरादारी सिग्नल बंद आशिल्ल्यान थंय येरादारी पुलीस येरादारीचें वेवस्थापन करतात.
कंत्राटदारान उक्तायली असमर्थताय
म्हापशें कोर्ट जंक्शनाचेर सीएसआर येवजणे खाला नव्या कंत्राटदारान येरादारी सिग्नल उबारलां. पूण तांत्रीक मुद्द्याचेर पालिका मंडळ आनी आमदार खोशी नात. तशी कल्पना आपणे त्या कंत्राटदाराक दिल्ली. ते उपरांत ह्या कंत्राटदारान आपण हें काम फुडें व्हरपाक शकना, तुमी दुसऱ्या कडल्यान तें काम करून घेयात, अशी विनवणी पालिकेक केल्या, अशी म्हायती पालिका सुत्रांनी दिल्या.
पालिका बसकेंत प्रस्न मांडटलेः नगराध्यक्ष
ज्या कंत्राटदाराक येरादारी सिग्नलाचें काम दिल्लें, तो फाटीं सरला. ही सिग्नलाची समस्या सोडोवचे खातीर आतां दुसऱ्या कंत्राटदारां विशीं निर्णय घेवचो पडटलो. हो विशय आमी परतून पालिका मंडळा मुखार मांडटले, अशी म्हायती नगराध्यक्ष शुभांगी वायंगणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
