भांगरभूंय | प्रतिनिधी
म्हापशें: कामरखाजन म्हापश्यां सर्वीस रस्त्याचेर ट्रकांतल्यान बेकायदो डेब्रीज (बांदकामाचो कोयर) कोयर उडोवपी कंत्राटदाराचेर म्हापशें पालिकेन 25 हजाराचो दंड दिलो. तशेंच तो कोयर थंयच्यान उखलून व्हरपाक लायलो.
ही घडणूक बुधवारा सांजेच्या 4 वरांच्या सुमाराक घडली. पेडें ते गिरी रस्त्याचेर कामरखाजन वाठारांतल्या सर्वीस रस्त्या कुशीक डेब्रीज कोयर एका ट्रकांतल्यान उडयतात, अशें थळाव्यांचे नदरेक पडलें. ह्या प्रकाराक तांणी हरकत घेतली. जीए 03 एन 4037 नंबराचो ट्रक धरून म्हापशें पालिकेच्या अधिकाऱ्यांक तशेंच पुलिशेक आपयले.
घडणुकेची म्हायती मेळटाच पालिका अभियंतो प्रदीप नार्वेकार, निरिक्षक शेखर गांवस, पर्यवेक्षक सुनील नायक, रमेश राव, वरद भिवशेट, ईश्वर अयनापुरे तशेंच प्रभाग नगरसेवक विकास आरोलकार घडणुकेचे सुवातेचेर पावले. तशेंच म्हापशें पुलिसूय थंय दाखल जाले. इमारत बांदकाम थळा वयल्यान हे टाकावू साहित्य हाडून तें सर्वीस रस्त्या कुशीक उडोवन विज्ञान, तंत्रज्ञान आनी पर्यावरण नेम मोडिल्ले खातीर कंत्राटदार रमेश पवार हाका 25 हजार रुपयांचो दंड दिलो. तशेंच थंय उडयिल्लो कोयर उखलून व्हरपाक लायलो.
शारांतल्या लोकांनी सादूर रावचें…
म्हापशें पालिकेन सध्या उक्ताडाचेर कोयर उडोवप्यां आड खर मोहीम हातांत घेतल्यो. शारांतले ब्लॅक स्पॉट आनी हेर कडेन पालिका कर्मचाऱ्यांचे पंगड कारवाये खातीर तैनात दवरल्यात. कामरखाजन वाठारांतल्या लोक सादूर रावल्यात तशेंच शारांतल्या हेर लोकांनीय सादूर रावून हे मोहिमेक आदार करचो, असो उलो पालिका अधिकाऱ्यांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
