भांगरभूंय | प्रतिनिधी
वर्गिकरणा खातीर सुवात नाशिल्ल्यान शारांत कोयर प्रदुशण
भांगरभूंय । प्रतिनिधी
म्हापशें : म्हापशें शारांत कोयराची गंभीर समस्या निर्माण जाल्या. नगरपालिके कडेन वर्गिकरणा खातीर सुवात नाशिल्ल्यान ब्लॅक स्पॉटांचेर कोयराच्यो राशी सांचून म्हापश्यां घाण मारपाक लागल्या.
म्हापशें पालिकेक आसगांव पठारा वयले सुवातेर कोयर उडोवपाक प्रदुशण म्हामंडळान उच्च न्यायालयाच्या आदेशा प्रमाण खर मनाय केल्या. जाल्यार कुचेलींतल्या एमआरएफ प्लांटांत फक्त वर्गिकरण केल्लोच कोयर घेतात. ताका लागून पालिकेक दर दिसा शारांतल्या ब्लॅक स्पॉटाचेरूच कोयराचें वर्गिकरण करचें पडटा. तरी लेगीत ब्लॅक स्पॉटाचेर म्हापशें तशेंच भोंवतणचे लोक हाडून मिश्रीत कोयर उडयतात. ते खातीर कामगारांक कोयर वर्गिकरण करपाक आडखळ निर्माण जाता. ते भायर हो कोयर वेळार पालिके कडल्यान उखलिनात. हालींच पालिकेन चालू केल्लो प्लास्टीक लायट हावस प्रकल्प हो सुको कोयर एकठांय केंद्राच्या वाठारांत लेगीत कोयर उडयतात. फाटले चार दीस शारांतल्या कोयर वेवस्थापनांत समस्या निर्माण जाल्ल्यान म्हापशेंच्या ब्लॅक स्पॉटाचेर कोयराच्यो राशी पडल्यात. तातूंत ह्या मिश्रीत कोयराक सोंसूंक जायना अश्यो घाणी मारपाक लागल्यात. हाका लागून शार कोयराच्या प्रदुशणांत सांपडलां.
कोयर वर्गिकरणाचे सुवातेक लागून समस्या
म्हापशें पालिके कडल्यान कोयराचें वर्गिकरण आसगांव पठाराचेर कोयर उडयताले. पूण 2022 त उच्च न्यायालयान प्रदुशणाच्या कारणा वयल्यान पालिकेक आसगांव पठाराचेर कोयर उडोवपाक मनाय केल्ली. तरी लेगीत पालिके कडल्यान कोयर उडयताले. हाका लागून ऑक्टोबर 2024 त आसगांव कोमुनिदाद आनी पंचायतीन हरकत घेतले उपरांत प्रदुशण मंडळान पालिकेक कोयर उडोवपाक बंदी घातली. तेन्ना सावन पालिका कर्मचारी ब्लॅक स्पॉटाचेरूच कोयराचें वेवस्थापन करताले.
शारांतल्या ब्लॅक स्पॉटाचेर एकठांय केल्लो कोयर कुचेली प्लांटांत धाडटात. वर्गिकरणाचे सुवातेर लोक रातच्या वेळार कोयर हाडून उडयतात. ह्या कोयराक सकाळीं घाणी मारपाक लागतात. ह्या कोयर वेवस्थापनाचेर योग्य उपाय काडपाचो पालिकेचो यत्न चालू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
