भांगरभूंय | प्रतिनिधी
पणजी : जेवणाच्या जिन्नसांनी रंग वापरून तशेंच तशेंच भेसळ करून जनतेचे भलायके कडेन खेळप्यांचेर ’एफडीए’न बरीच खर नदर दवरल्या. ’एफडीए’ न सध्या धडक मोहीम सुरू केल्या. एफडीएचे हे कारवायेक लागून जिन्नसांनी भेसळ करप्यां मदीं बरोच बोवाळ निर्माण जाला.
कांय आस्थापनां खावपाच्या जिन्नसांनी व्हडा प्रमाणांत भेसळ करतात. अशे जिन्नस खाल्ले उपरांत राज्यांतले जनतेचे भलायकेक बरोच फटको बसता. असल्यो गजाली बंद करपा खातीर संबंदीत आस्थापनांचेर खर कारवाय करतले अशें भलायकी मंत्री विश्वजीत राणे हांणी सप्तकभरा पयलींच स्पश्ट केल्लें.
हेच फाटभूंयेर ’एफडीए’ अलर्ट मोडाचेर आशिल्ल्यान म्हापशें आनी लागसारच्या कांय भागांत ’एफडीए’न विशेश देखरेख मोहीम राबयता आस्थापनांची तपासणी सुरू केली. कांय दिसां पयलीं म्हापशें- करासवाडो आनी थिये जेवण आनी वखदां प्रशासनान १८ आस्थापनांची तपासणी केल्ली. हातूंत नितळसाण आनी सुरक्षा नेम पाळूंक नाशिल्ल्यान ८ आस्थापनां बंद केल्लीं. तशेंच ह्याच वाठारांतली बेकरी, ज्यूस सेंटर, फास्टफूड स्टॉल आनी हॉटेलांची पळोवणी केली.
हेर राज्यांतल्यान गोंयांत हाडपी फळां तशें हेर खावपाच्या जिन्नसांनी रंग वापरिल्ल्याचे वा भेसळ जाल्ल्याचे प्रकार मुखार येतात. हाका लागून ’एफडीए’न शिमेचेर गस्त घालून अशा जिन्नसांची येरादारी करपी वाहनांची तपासणी करतले अशें राणे हांणी सांगलें.
फाटल्या कांय दिसांची कारवाय
-जेवणांत जावपी भेसळ लोकांक वळखुपाक येना. ताचोच फायदो भेसळ करपी घेतिल्ल्यान सध्या लग्नाच्या निमतान मिठाय तशेंच हेर तयार जेवणाचे जिन्नस विक्री करपी आस्थापनांचेर एफडीएची विशेश देखरेख मोहीम सुरू आसा.
-शुक्रार ११ तारखेर सांजेवेळार करासवाडो आनी थिये जेवण आनी वखदां प्रशासनान १८ आस्थापनांची तपासणी केली. हे मोहिमे वेळार एफडीएकडल्यान नामनेची बेकरी, ज्यूस सेंटर, फास्टफूड स्टॉल आनी हॉटेलाची पळोवणी केली. ह्या वेळार आठ आस्थापनांनी नितळसाणेचो उणाव दिसून आयिल्ल्यान ती बंद केली.
-म्हापशें मार्केट सब यार्डांत कृत्रिमतरेन पिकोवपी आंबो आनी केळीं विक्री घाऊक दुकानांचेर जेवण आनी वखद प्रशासनान सोमारा १४ तारखेर छापो घालून सुमार ८ लाखांचो माल जप्त केलो. हातूंत १८० डबे आंबा आनी ४५० किलो केळींचो आसपाव आशिल्ल्यान तीन दुकानां बंद केलीं.
-म्हापशेंच्या नामनेच्या वाळके हॉटेलांत नितळसाण आनी जेवण सुरक्षा निकशांत गंभीर त्रुटी मेळ्ळ्यो. हाचे खातीर एफडीएन हॉटेल बंद करपाचे आदेश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
