भांगरभूंय | प्रतिनिधी
म्हापशें: कुमया मरड, गिरी हांगा वास्तू प्लाझा इमारतींत वेगळो इलेक्ट्रीक चार्जर बसोवन विजेची चोरी केल्ले खातीर जाप विचारिल्ल्याच्या कारणा खाला रहिवासी वासुदेव शिरोडकार आनी सनी कारेकार हांकां मारपेट करपाचो प्रकार घडलो. ह्या प्रकरणांत म्हापशें पुलिसांनी संतोष जैस्वाल कुटुंबां सयत आठ जाणां आड गुन्यांव नोंद केला.
ही घडणूक आयतारा रातच्या 12.30 वरांच्या सुमाराक घडली. वास्तू प्लाझांत रहिवाश्यांनी इलेक्ट्रीक वाहनां चार्ज करपा खातीर चार्जींग पॉयंट बसयला. पूण हाच्या विजेची रक्कम जैस्वल कुटूंब भरिनाशिल्ल्यान रहिवाश्यांनी तांकां चार्जींग पॉयंट वापरपाक आक्षेप घेतिल्लो.
आयतारा 2 वेर रातीं दुबावीत जैस्वाल भावांनी दुसरो इलेक्ट्रीक चार्जींग पॉयंट उबारिल्ल्याची कागाळ शिरोडकार हांचे नदरेक आयली. तांणी हो प्रकार सोसायटीच्या वॉट्सअॅपार धाडलो आनी उपरांत मध्यान रातीं सनी कारेकार हांच्या फ्लॅटा मुखार संतोष जैस्वाल आनी ताचे पूत मंजीत आनी आर्यन आयले. तांणी सनी हांचो हात धरून तांकां तशेंच तांचे घरकान्नीक धक्काबुक्की केली.
ह्या वेळार तांचे मजतीक कागाळ करपी गेले तेन्ना दुबावीत बापूय पुतांनी आपल्या हेर वांगड्यांच्या आदारान शिरोडकार हांचेर क्रिकेटीचें बॅट आनी हातांतल्या कड्यान हल्लो केलो.
दुबाविताचे तावडेंतल्यान शिरोडकार हांणी सुटून फ्लॅटांत धांव घेतली तेन्ना बंद दाराची लेगीत दुबावितांनी मोडतोड केली. तशेंच शिरोडकार हांचे आवयक लेगीत धक्काबुक्की करून तांकां जिवेशी मारपाची धमकी दिली.
घडणुकेची म्हायती मेळटकच पुलिसांनी घडणूक थळार धांव घेतली आनी जखमी तशेंच दुबावितांक पुलीस स्टेशनार हाडले. जखमीचेर गोमॅकाँत उपचार केले. उपरांत पुलिसांनी वासुदेव शिरोडकार हांची कागाळ नोंद करून घेतली.
पूण सोमारा रातीं मेरेन दुबावितां आड पुलीस गुन्यांव नोंद करीत नाशिल्ल्यान शिरोडकार कुटूंब तशेंच इश्ट परिवारान पुलीस स्टेनार रेवाडो घालो. उपरांत रातीं उसरां गुन्यांव नोंद केलो. तशेंच दुबावीत मंजीत जैस्वाल हाका पुलिसांनी अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
