भांगरभूंय | प्रतिनिधी
म्हापशें ः म्हापशेंच्या कोर्ट जंक्शना लागसार दुचाकीन गाडयेक फाटल्यान धपको दिल्ल्यान महेश बसूराज पुजारी (२७, खडपावाडो- कुचेली) ह्या दुचाकी चालकाक आक्ताक मरण आयलें.
हो अपघात आयज शुक्रार ता. २२ ऑगस्टाक सकाळीं सुमार ६ वरांचेर जालो. मरण आयिल्लो पुजारी जीए ०३ एएक्स ८६७० नंबराच्या एन्टोर्क स्कुटरीवेल्यान म्हापश्यां शारांत येतालो. जाल्यार टीएन ३८ सी एक्स ४७४७ नंबरा खातीर टाटा नेक्सन गाडी घेवन तामिळनाडूंतल्यान नवेंच लग्न जाल्लें जोडपें गोंयांत आयिल्लें.
कोर्ट जंक्शन लागसारा पुजारी हांचे दुचाकीन गाडयेक नेटान धपको दिलो. हातूंत तो रस्त्यार पडलो आनी ताका थंयच मरण आयलें.
हो अपघात पळोवन मुखारच्यान येवपी एके तरणाटेन नेटान ब्रेक मारलो. हाका लागून तिची दुचाकी लवंडली. मात ते तरणाटेक कांय जावंक ना. ह्या अपघाताची म्हायती मेळटांच १०८ ऍम्बुलन्स घडणुके सुवातेर पावली. थंय दोतोरांनी पुजारी हाका मरण आयिल्ल्याचें सांगलें.
म्हापशें पुलीस उपनिरीक्षक रविना मावतोंडकार आनी हवालदार केशव नायक हांणी अपघाताचो पंचनामो केलो. पुजारी हाची कूड पोस्टमार्टमा खातीर धाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
