भांगरभूंय | प्रतिनिधी
म्हापशें ः हांगाच्या हुतात्मा चौकांत गाडयेच्या धपक्यान जखमी जाल्ले दुचाकी चालक रामचंद्र प्रभू साळगांवकार (७३, रा. अन्साभाट, म्हापशें) हांकां उपचारा मजगतीं मरण आयलें. ह्या प्रकरणांत पुलिसांनी गाडी चालक देवदत्त मनोहर पाटील (३५, रा. मेरशी, मूळ हेरे, चंदगड) हाचे आड गुन्यांव नोंद केला.
हो अपघात फाटल्या ५ डिसेंबर दिसा सकाळच्या सुमार ९.४५ वरांचेर घडिल्लो. जखमी जाल्ले प्रभू साळगांवकार हांचेर गोमेकॉंत उपचार चलताले. बुधवारा २४ तारखेर सकाळीं उपचारा मजगतीं तांकां मरण आयलें.
घडणुके दिसा सकाळीं घरा कडल्यान रामचंद्र प्रभू साळगांवकार हे जीए ०३ ई ००२४ हे दुचाकी वेल्यान बाजारांत आशिल्ल्या आपल्या दुकानाचेर वचपाक भायर सरले. जाल्यार दुबावीत गाडी चालक एमएच ०४ एफझेड ९१७७ नंबराची गाडी घेवन हुतात्मा चौका वेल्यान आल्तीन म्हापशेंचें दिकेन वतालो. ह्या वेळार गाडयेचो धपको दुचाकीचेर बसलो. तेन्ना दुचाकी चालक रामचंद्र हांचो तोल वचून ते रस्त्यार कोसळ्ळे आनी गंभीर जखमी जाले. तांचेर फाटल्या १९ दिसां सावन उपचार सुरू आशिल्ले.
पुलीस हवालदार नीलेश घाडी हांचे कागाळीच्या आदारार म्हापशें पुलिसांनी गाडी चालकाचेर गुन्यांव नोंद केला. फुडलो तपास पुलीस उपनिरीक्षक रविना मातोंडकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
