भांगरभूंय | प्रतिनिधी
म्हापशें: दत्तवाडी म्हापश्यां जंक्शनाचेर स्कुटर आनी मोटरसायकल हांचे मदीं जाल्ल्या अपघातांत दर्शन सिमेपुरुसकार (47, रा. ओशेल शिवोली) हाका मरण आयलें. जाल्यार जस्टीन जेम्स (23, रा. केरळ) हो पर्यटक गंभीर जखमी जालो.
हो अपघात सोमारा दनपारां 1 वराच्या सुमाराक जालो. दर्शन सिमेपुरुसकार अॅक्टीवा स्कुटरी (जीए 03 ओएल 2292) वयल्यान म्हापशें सावन शिवोले वतालो. जाल्यार जस्टीन जेम्स मोटरसायकली (केए 46 एन 2219) वयल्यान शिवोली मार्गांतल्यान म्हापश्यां येतालो. दोनूय दुचाकी मुखा वयल्यान एकामेकांक नेटान आदळ्ळ्यो. तातूंत दर्शन आनी जस्टीन गंभीर जखमी जाले जाल्यार मोटरसायकली फाटल्यान बशिल्लो मार्टीन मॅथीव (बंगळुरू) किरकोळ जखमी जालो.
जखमींक म्हापशेंच्या जिल्हो हॉस्पिटलांत दाखल केले तेन्ना दोतोरांनी दर्शन हाका आदींच मरण आयिल्ल्याचें जाहीर केलें. जस्टीन हाका फुडल्या उपचारा खातीर बांबोळेच्या गोमॅकाँत धाडलो. थंय ताचेर उपचार चालू आसात.
अपघाताचो पंचनामो पुलीस उपनिरिक्षक विराज कोरगांवकार आनी हवालदार तुळशीदास नारोजी हांणी केलो. मजगतीं, अपघाता उपरांत सुमार अर्द वर 108 अॅम्ब्युलन्स घडणुकेचे सुवातेचेर पावूंक ना. जखमींक हॉस्पिटलांत व्हेले उपरांत ती अपघाताचे सुवातेचेर पावली. वेळार ती पावूंक नाशिल्ल्यान जखमींक वेळार उपचार मेळूंक नाशिल्ल्यान थंय जमिल्ल्या लोकांनी तिडक उक्तायली.
दर्शन घरांत एकटोच जोडटालो…
बंगळुरूच्या एका म्हाविद्यालयांतलो जस्टीन जेम्स आनी ताचे इश्ट अशें स जाण गोंयांत भोंवपाक आयिल्ले. ते सगळे हणजुण्यां हॉटेलांत रावताले. ते सगळे दुचाकी वयल्यान हणजुणेंच्यान शिवोली मार्गान म्हापश्यां येताले. मरण आयिल्लो दर्शन सिमेपुरुसकार हो परिवारांतलो एकलो जोडपी आशिल्लो. घरकान्न, 14 वर्सां पिरायेची चली, आवय आनी मांय अशें पांच जाणांचें कुटुंब तो चलयतालो. म्हयन्याक 10 हजार रुपया पगाराचेर तो म्हापश्यां एका वखदां पुरवण करपी दुकानाचेर काम करतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
