भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें शारातंली येरादारी सिग्नल यंत्रणा बुधवार 28 जून सावन कार्यान्वित करतले. फाटल्या देड दोन वर्सां सावन ही यंत्रणा परतून सुरू करपाक म्हापशें पालिका मंडळाक निमाणे म्हूर्त मेळ्ळो. सोमाराक सिग्नलांची चांचणी घेतली.सुरवेक म्हापशें कोर्ट जंक्शन, हळदोणे बसस्टॉप जंक्शन, पोरणी पालिका इमारती सामकारेच सिग्नल बुधवारा सुरू करतले. गांधी चौक, बांदकाम खातें कार्यालय, आनी हुतात्मा चोक हांगची सिग्नलां फुडल्या सप्तकांत सुरू करतले.
कोट जंक्शना कडेन दिसभर येरादारीची वर्दळ आसात. ताका लागून सकाळ आनी सांजे सिग्नलाचो वेळ 60 तें 70 सेकंद आनी दनपारां 3 तें 4.30 मजगतीं 26 सेकंद आसतलो. येरादारी पुलिसांची सूचोवणी आनी गरजे प्रमाण ह्या वेळांत बदल करतले. ओम साई क्रिएशनान वेवसायीक सामाजीक जापसालदारी (सीएसआर) खाला ही सिग्नल यंत्रणा उबारल्या आनी तिची देखरेख हीच संस्था करतली.
शिक्षणीक वर्स सुरू जाल्ल्यान म्हापश्यांतली येरादारी वाडल्या. येरादारीचेर नियंत्रण दवोरपा खातीर पालिका मंडळान कोर्ट जंक्शन आनी हेर मुखेल सुवातांनी सिग्नल यंत्रणा उबारपाचो थाराव पास केल्लो. पालिका मंडळान शारांत स कडेन सिग्नल उबारल्यात. मात शारांतले चडशे रस्ते अशीर आसात. ताका लागून येरादारीची कोंयडी जावपाची समस्या आसा तशीच उरतली अशें काँग्रेस पक्षाचो सरचिटणीस विजय भिकेन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
