भांगरभूंय | प्रतिनिधी
सगल्यो अडचणी, दिश्ट बाधा तो पयस करता, अशी लोकांची श्रद्धा आसा.
बोडगेश्वर म्हणल्यार म्हापशेकारांचो राखणदार. जो दरेकल्याची राखण करता. ह्या देवाची जात्रा गोंयभर फामाद. गोंयभरचे लोक जात्रेक आपली हाजेरी लायतात. लोकांचो ह्या राखणदाराचेर खूप भावार्थ. जितलो हो देव फामाद तितलीच ताची जात्रा. जात्रेक कांय जाण बोडगिणीची जात्राय म्हणटात. म्हापशेकारांची राखण करपी हो राखणदार. सतत आपल्या भक्तांची वाट पळयता. धादोस जाल्ल्या भक्तांक पळोवन तोय तृप्त जाता. लोक ताका आंगवणीचोय देव म्हूण वळखतात. आंगवण पुराय जाली कांय लोक ताका केळ्याचो घड अर्पण करतात. जितले देवूळ सुंदर तितलोच देवूय सुंदर आसा. वाटकुळेंच तोंड, तकलेक फेटो, हातांत दांडो असो ताजो भेस. मनाक ओडलायणो दिसता.
सगल्यो अडचणी, दिश्ट बाधा तो पयस करता, अशी लोकांची श्रद्धा आसा. शेणिल्याक तो घरा पावयता. वाट चुकिल्ल्याक वाट दाखयता. दुखी आशिल्ल्याक सुखी करता आनी रिकाम्या हातानं आयिल्ल्याक भरभरून दिवन घरा धाडटा. निरशेल्याची आस, शेणिल्ल्याक ध्यास, देव बोडगेश्वर आसल्यार, जातली पयस संकष्टा हजार. ताची महती आनी कीर्त खूप व्हड. आयिल्लीं संकश्टां तो पयस करता. लोक व्हडा संख्येन जात्रेक येतात आनी फुलां, फळां देवाक अर्पण करतात. लोक हांगा येवन आंगवणी करतात. आपणाक जें जाय तें मागतात. त्यांच्यो मागण्यो देव बोडगेश्वर पुराय करतलोच हो लोकांचो विश्वास. जात्रे दिसा देवूळ फुलांनी तशेच लायटींनी सजयतात. येणारो जाणारो मन धादोस करून घरा परतता. देव बोडगेश्वर सगळ्यांच्यो इत्सा पूर्ण करु आनी सगल्यांची राखण करू हेंच देवालागीं मागणे.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
