भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें शार वाठारांत पाच सुवातांनी म्हापशें पालिका मंडळ येरादारी सिग्नल बसयतलें. ते खातीर मंडळान ओम साई क्रिएशन्स हे एजन्सी कडेन सिग्नल बसोवपाची कबलात केल्या. फाटल्या कांय म्हयन्यां सावन कोर्ट जंक्शना कडलें सिग्नल बंद आसा. पयलींचे एजन्सीन सिग्नलाची सेवा फुडाराक दिवपाक न्हयकार दिल्लो. ते उपरांत पालिकेन एके एजन्सीक हें काम दिल्लें. मात तांणी बसयल्ल्या सिग्नलाचें अलायमेंट सारकें नाशिल्ली. ते खातीत ते एजन्सीन सेवा बंद केली.
मुखेल जंक्शनाचेर येरादारी सिग्नल .यंत्रणा नाशिल्ल्यान शारांत येरादारीची कोंयडी जाता. आनी तिचेर नियंत्रण दवोरपाक पुलिसांक कुस्तार जाता. सिंग्नल बसोवपाचे जायते प्रस्ताव म्हापशें पुलीस कार्यालयांत पालिकेक धाडिल्ले आसात. ओम साई कडेन केल्ले कबलाती प्रमाण शारांत कोर्ट जंक्शन सयत, गांधी चौक, उदका पुरवण विभागाच्या कार्यालया सामकार, हळदोणे प्रासार जंक्शन सिग्नल यंत्रणा बसयतले अशी म्हायती नगराध्यक्ष प्रिया मिशाळ हिणे दिली. फुडल्या पंदरा दिसांत सिग्नल यंत्रणा कार्यरत जातली अशें मुख्याधिकारी अमितेश शिरवयकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
