भांगरभूंय | प्रतिनिधी
म्हापशेंः कामरखाजन म्हापशें हांका राष्ट्रीय म्हामार्गार ट्रॉलीट्रकाचो पंक्चर जाल्ल्या टायराचो ड्रम रस्ताक घासून उजो लागून ताचे 6 टायर लासले. ताका लागून 4 लाख रुपयांचें लुकसाण जालें. बिरेस्तारा मध्यान रातीं ही घडणूक जाली.
जीए 06 टी 7402 ह्या नंबराचो 16 टायरांचो खडीची येरादारी करपी ट्रॉलीट्रक बांदा सावंतवाडीच्यान वास्को हांगा वतालो. कामरखाजन जंक्शनार ट्रकाच्या रोदांक उजो लागला अशें एका वाहन चालकाक दिसलें, ताणे ट्रक थांबयलो आनी ड्रायव्हर सुरेश हांका उज्याची म्हायती दिली. उपरांत म्हापशेंच्या उजो पालोवपी कार्यालयाक म्हायती दिली.
ह्या ट्रॉलीट्रकाचो एक टायर पंक्चर जाल्लो. ट्रकांत खडी आशिल्ल्यान ताच्या वजनान हो टायर फुटलो आनी ड्रम रस्तार घासत गेलो. ताका लागून कीट पडून उजो पेटलो आनी तो टायरांक लागलो. एके वटेनच्या स टायराक हो उजो लागलो. म्हापशें उजो पालोवपी दलाचे उपअधिकारी अशोक परब हाच्या मार्गदर्शना खाला जवानांनी हो उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
