भांगरभूंय | प्रतिनिधी
म्हापशें: म्हापश्यां एका दुकानांत डिजिटल आनी व्हिडियो गेम्स मिनी कॅसिनो जुगार सुरू केला. मार्केटांत हो मिनी कॅसिनो बिनधास्तपणान चलता.
म्हापशें मार्केटांतल्या भाजी आनी नुस्त्यां मार्केटा लागसारच्या दुकानांत हो जुगार चलता. लकी इलेक्ट्रॉनिक्स नांवाचें दुकान बंद करून तातूंत हो बेकायदो जुगार सुरू केला.
पालिकेच्या मालकीच्या ह्या दुकानांत हो मिनी कॅसिनो सुरू केला. तातूंत जुगार खेळचे खातीर कंप्युटर बसयला. ताच्या माध्यमांतल्यान जुगार खेळटात. ह्या वाठारांत लोकांचें यो-व्हड प्रमाणांत आसता. ताका लागून सोपेपणी गिरायक मेळटलें, हे आशेन थंय जुगार सुरू केला. पालिकेच्या नेमा प्रमाण दुकानाच्या मूळ भाडेकरूंक दुसऱ्याक भायले भायर दुकान भाड्याक दिवपाक मेळना. तशेंच दुकानांत तंबाखूचे वा जुगारा संबंदीत वेवसाय करपाक कायद्यान बंदी आसा. तरी लेगीत तें दुकान भायले भायर दुसऱ्याक भाड्याक दिवन तातूंत बेकायदो वेवसाय सुरू करपाक उर्बा दिल्या.
म्हायती मेळ्ळ्या, धाड घालतलेः मुख्याधिकारी
मार्केटांतल्या एका दुकानांत मिनी कॅसिनो भशेन जुगार सुरू केल्ल्याची म्हायती आमकां मेळ्ळ्या. हो प्रकार बेकायदो आसा. आमी त्या दुकानाचेर धाड घालतले आनी दुकानाक सील मारतले. तशेंच संबंदीत भाडेकरीक कारणां दाखल नोटीस जारी करतले. मार्केटांत अशे तरेन सुरू आशिल्ल्या बेकायदो वेवसायांचेर कायदेशीर कारवाय करतले, अशी म्हायती पालिका मुख्याधिकारी अमितेश शिरवयकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
