भांगरभूंय | प्रतिनिधी
मार्केटांतल्या अतिक्रमणाचो प्रस्न परतून साणीर
भांगरभूंय । प्रतिनिधी
म्हापशें : म्हापशें बाजारांत एका तरणाट्यान सुरी घेवन स्वताचो गळो चिरपाचो प्रकार घडलो. ह्या अज्ञात तरणाट्याचेर गोमॅकाँत उपचार चालू आसात. रस्तो आडावन बसपी विक्रेत्यांक लागून घडणुकेचे सुवातेर अॅम्ब्युलन्स घडणुकेचे सुवातेर पावपाक शकली ना. हाका लागून रस्ते आडावपाचो प्रस्न परतून साणीर आयला.
ही घडणूक आयतारा सांजेच्या 6.30 वरांच्या सुमाराक घडली. जखमी 20 ते 25 पिराय गटांतल्या तरणाट्यान बाजारांतल्या पॅराडायस फार्मासीचे पाळणेंत आयलो. पाळणेंतल्या सामंत हांच्या दुकाना लागसार रस्त्याचे कुशीक बशिल्ल्या विक्रेत्या कडली सुरी उखल्ली आनी कांय खिणांत ताणें ती आपल्या गळ्याचेर ओडली. तातूंत तो रगतान माखलो आनी रस्त्याचेर पडलो. ह्या वेळार बाजारांत गर्दी आशिल्ली. हो प्रकार पळोवन लोकांनी घडणुकेचे सुवातेर धांव मारली. घडणुकेची म्हायती मेळटाच 108 अॅम्ब्युलन्स आनी पुलीस थंय पावलो.
ही घडणूक बसस्टॅण्डा पसून सुमार 100 मिटरांचेर घडिल्ली. मात बाजारांतलो रस्तो घोळट्या विक्रेत्यांनी आपलो वेवसाय मांडून आडयल्लो. ताका लागून घडणुकेचे सुवातेर अॅम्ब्युलन्सीक पावपाक आडखळ जाली. निमाणे पुलिसांचे मजतीन अॅम्ब्युलन्स कर्मचाऱ्यांनी स्ट्रेचरा वयल्यान जखमी बसस्टॅण्डाचेर व्हेलो आनी थंयच्यान ताका जिल्हो हॉस्पिटलांत दाखल केलो. दोतोरांनी जखमीक रोखडोच फुडल्या उपचारा खातीर गोमॅकाँत धाडलो. थंय ताचेर उपचार चालू आसात.
म्हापशें मार्केटांतल्या अतिक्रमणांक लागून अॅम्ब्युलन्सीक आपत्कालीन परिस्थिती वेळार बाडारांत येवपाक परतून आडखळ निर्माण जाली. ह्या प्रकाराक लागून अतिक्रमणांचो प्रस्न परतून साणीर आयला. मजगतीं त्या तरणाट्यान आत्महत्या करपाचो यत्न कित्याक केलो, हें रातीं उसरां मेरेन स्पश्ट जावंक नाशिल्लें. म्हापशें पुलीस उपनिरिक्षक बाबलो परब फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
