भांगरभूंय | प्रतिनिधी
एकेच रातीं फोडलीं स दुकानां
भांगरभूंय । प्रतिनिधी
म्हापशें : म्हापशें बाजारांत चोरांनी धुमाकूळ घालून एकेच रातीं स दुकानां फोडलीं. नितीन आरोलकार हांच्या दुकानांतले एक लाख रुपया जाल्यार हेर दुकानांतल्यो मोलादीक वस्तू चोरांनी फारायल्यो. हे घडणुकेक लागून म्हापशें बाजारांतले सुरक्षेचो प्रस्न उपस्थीत जाला.
हो चोरयेचो प्रकार शुक्रारा सकाळीं उजवाडाक आयलो. ब्रागांधा बेकरी दुकानाच्या वाठारांतल्या आरोलकार हांच्या दुकाना सयत हेर पांच दुकानां चोरांनी फोडलीं. बिरेस्तारा 2 एप्रीलाची मध्यानरात ते शुक्रारा 3 एप्रीलाची फांतोड ह्या वेळांत चोरांनी हीं दुकानां फोडलीं. शुक्रार हो सप्तकी बाजाराचो दीस आशिल्ल्यान बिरेस्तारा रातीं सदचे भशेन वेपारी बाजारांत आपल्या सामाना सयत न्हिदिल्ले. तरी लेगीत चोरांनी आपलें काम केलें, हाका लागून वेपाऱ्यां मदीं भंय पातळ्ळा.
अज्ञात चोरांनी बाजारांतल्या पांच दुकानांच्या शॅटरा वयलें कुलप फोडून भितर प्रवेश केलो. जाल्यार एका दुकानांत तांकां भितर वचपाक मेळ्ळें ना. डेकोरेशन, प्लास्टिकच्यो डिस्पोजेबल वस्तू आनी कपड्यांच्या दुकानांचो फोडिल्ल्या दुकानां मदीं आस्पाव आसा. आरोलकार हांच्या दुकानाच्या गल्ल्यांत दवरिल्ले एक लाख रुपया चोरांच्या हाताक मेळ्ळी. तशेंच एका दुकानांतल्यान भांगराची मुदी चोरांनी फारायली. ते भायर हेर दुकानांतल्यान कांय वस्तू फारायल्यो. घडणुकेची म्हायती मेळटाच म्हापशें पुलीस उपनिरिक्षक अजय धुरी आनी सांगात्यांनी बाजारांत वचून पंचनामो केलो. दुकानकारांनी ह्या चोरी प्रकरणांत कागाळ दाखल केल्या. फुडलो तपास पुलीस करतात.
सीसीटीव्ही नाशिल्ल्यान घेतलो गैरफायदो
बाजारांत सीसीटीव्ही नाशिल्ल्याचो गैरफायदो घेवन चोरांनी हो धुमाकूळ घातलो. म्हापशें बाजारांत लायिल्ले सीसीटीव्ही कॅमेरा खूब वर्सां सावन बंद पडल्यात. बाजाराचे सुरक्षे कडेन नगरपालिकेन घाळपणा केल्ल्यान चोरांचें फावलें, असो आरोप वेपारी करतात. ते भायर रातच्या वेळार पुलीस गस्त खंय गायब जाल्ली, असोय प्रस्न वेपाऱ्यांनी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
