भांगरभूंय | प्रतिनिधी
म्हापशें: कदंब बस स्टॅण्डा वेल्या 192 कोटी रुपयांच्या नियोजीत नव्या पुनर्विकास प्रकल्पांत आस्पाव आशिल्ल्या लक्झरी शॉपींग मोलाक थळाव्या वेपाऱ्यांनी खर विरोध केला. ह्या प्रकल्पा आड वेपारी वर्गान सयांची मोहीम सुरू केल्या.
गोंय सरकार म्हापशें बस स्टॅण्डाचो हो प्रकल्प डिझायन, बिल्ड, फायनान्स, ऑपरेट अॅण्ड ट्रान्सफर (डीबीएफओटी) ह्या तत्वाचेर राबयत आसा. 27 हजार चौखण मिटर सुवातेंत जावपी ह्या प्रकल्पांत बस टर्मिनला बराबरच एक प्रशस्त वेपारी संकुलाचो आस्पाव केला.
दुकानदारांच्या मतान, उत्तर गोंयची अर्थीक वाहिनी म्हापशेंच्या इतिहासीक दायज आशिल्ल्या परंपरीक ह्या बाजारपेठेचेर आतां सरकारान आधुनिकतायेच्या नांवा खाला संकश्ट उबें केलां. कॉर्पोरेट मॉला मुखार ल्हान वेपारी तिगप कठीण आसून हो मॉल चालीक लागत जाल्यार फाटल्या खूबशा पिळग्यां सावन ह्या मार्केटांत वेवसाय करपी अडेज हजारां परस चड कुटुंबांचो उदरनिर्वाहाचो प्रस्न निर्माण जातलो. तशेंच ह्या बाजारपेठेचें अस्तित्वूच घाताक येतलें.
नव्या बस स्टॅण्डाच्या नांवा खाला उबो रावतल्या मॉल प्रकल्पाक 192 कोटी रुपया खर्च करतात. पूण मूळ बाजारपेठेंत दुरावस्थेंत आशिल्ली गटार वेवस्था, रस्ते आनी वीज वाहिन्यांचेर एक पयसो लेगीत खर्च करिनात. तशेंच ह्या मॉलाक लागून शारांत येरादारीची कोंयडी आनी प्रदुशणांत व्हड प्रमाणांत वाड जातली असो दावो वेपाऱ्यांनी केला.
म्हापशें वेपारी संघटणेचे अध्यक्ष जितेंद्र फळारी हांणी ह्या विशयाचेर उलयतना सांगलें, म्हापशें शाराक आयज व्हड मॉलाची गरज ना. जाल्यार पार्कींग आनी कोयर वेवस्थापनाची गरज आसा. बस स्टॅण्डार प्रवाशांचे सुविधे खातीर पार्कींग आनी हेर सोयी आसूंक जाय. वेवसायीक मॉल हाडून थंय गर्दी वाडोवप ही पुरायपणान चुकीची येवजण आसा.
मजगतीं, ह्या प्रकल्पाक वेपारी वर्गान खर विरोध करून सयांची मोहीम सुरू केल्या. वेपारी वर्गाच्या सयां सयत मॉल प्रकल्पाक विरोध करपी सविस्तर निवेदन रोखडेंच सरकार, राजकी फुडारी आनी संबंदितांक सादर करपाचे आसात.
नियोजीत म्हापशें कदंब बस स्टॅण्ड प्रकल्पांतल्यान शॉपींग मोलाचो भाग पूर्णपणान वगळप, बस स्टॅण्डाचो वापर हो फक्त प्रवाशांची सोय, पार्कींग आनी कॅण्टिना खातीरच मर्यादीत दवरचो. नव्या प्रकल्पा बदला सद्याच्या म्हापशें पालिका बाजारपेठेच्या नुतनीकरणा खातीर निधी उपलब्ध करचो, ह्याे वेपारी वर्गाच्यो मुखेल मागण्यो आसात.
म्हापशें बाजारपेठेंत आमी वेपारी वर्ग पिळग्यान पिळग्यो वेवसाय करीत आसात. पयलींच ऑनलायन शॉपींग आनी मॉलाक लागून आमचो वेवसाय अडचणींत आसा. कदंब बस स्टॅण्डार मॉल उबो रावत जाल्यार आमी थळावे ल्हान वेपारी उद्धवस्त जातले. तशेंच बाजारपेठेचें अस्तित्व कोलमडून वतलें.
– जितेंद्र फळारी, अध्यक्ष, म्हापशें वेपारी संघटणा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
