भांगरभूंय | प्रतिनिधी
म्हापशें: हेर राज्यांतले प्रवासी आनी खाजगी म्हाल येरादारी वरवीं जावपी खावपाच्या सामानाची येरादारी आडावपाचे मोहिमे खाला अन्न आनी वखदां प्रशासनान म्हापश्यां बस स्टॅण्डाचेर बिरेस्तारा धाड घातली. हे धाडींत सांगली महाराष्ट्र आनी चिकोडीच्यान आयिल्लो सुमार 500 कील वजनाचो पनीर जप्त केलो. ह्या पनिराचें मोल सुमार देड लाख रुपया आसा. हो म्हाल साश्टी आनी बार्देस म्हालांतल्या दर्यादेग वाठारांतल्या आस्थापनांनी वतालो.
बुधवारा 3 जुलयाक अन्न आनी वखदां प्रशासनान मडगांवां कांय आस्थापनांची तपासणी केल्ली. हे तपासणेंत लेबल नाशिल्लो पनीर सांपडिल्लो. ह्या पनिराचो म्हाल शेजारच्या राज्यांतल्यान खाजगी गाडयेंतल्यान म्हापश्यां आयलो आनी थंयच्यान ताची पुरवण जाल्ल्याची म्हायती चवकशे वेळार उक्ती जाल्ली. ते प्रमाण बिरेस्तारा 4 जुलयाक सकाळीं प्रशासनाच्या अधिकार्यांनी म्हापशें आंतरराज्य बस स्टॅण्डाचेर पाळत दवरली. एका खाजगी मालवाहू रिक्षा टेम्पो येताच अन्न आनी वखदां प्रशासनाच्या अधिकार्यांनी ह्या टेम्पोची पळोवणी केली. तेन्ना तांकां तातूंत सुमार 200 कील पनीर सांपडलो. उपरांत प्रशासनान कांय प्रवासी बशींची पळोवणी केली. तेन्ना ते बशींतूय सुमार 300 कील पनीर सापडलो. हो सगळो माल अधिकार्यांनी जप्त केलो. उपरांत म्हापशें नगरपालिकेचे मजतीन ह्या सगळ्या म्हालाचो विलो लायलो.
प्रशासनाचे अधिकारी रिचर्ड नोरोन्हा हांणी सांगलें, जप्त केल्लो हो पनीर सांगली आनी चिकोडी वाठारांतल्यान आयिल्लो. मडगांवां तपासणे वेळार योग्य म्हायती दिनाशिल्ल्या, लेबल नाशिल्ल्या पनिराचो म्हाल म्हापशेंच्यान आयिल्ल्याची म्हायती मेळिल्ली. ते प्रमाण प्रशासनान ही कारवाय केली. वेवसायीक तशेंच पुरवणदारांनी नेम पाळचे आनी गुणवत्तात्मक म्हालाची पुरवण जावची, हो हे कारवाये फाटलो हेत आशिल्ल्याचें तांणी सांगलें.
असल्यो गजाली बंद जावपा खातीर दूद तशेंच हेर खावपाच्या म्हालाची गोंयांत जावपी येरादारीचेर लक्ष दवरचें, अशी आमी महाराष्ट्र आनी कर्नाटकाच्या अन्न आनी वखदां प्राधिकरणा कडेन संपर्क करून मागणी करतले. तशेंच कार्बोचो वेवसाय करपी बस ऑपरेटरांक स्टोरेज वेवस्था करून आनी परवाने घेवनूच हो वेवसाय करपाचो निर्देश दितले, अशें नोरोन्हा हांणी सांगलें.
अन्न आनी वखदां प्रशासनाची संचालक ज्योती सरदेसाय हांच्या मार्गदर्शना खाला अधिकारी रिचर्ड नोरोन्हा, वरिश्ठ अन्न सुरक्षा अधिकारी राजाराम पाटील आनी शैलेश शेणवी, अन्न सुरक्षा अधिकारी प्रितम परब, प्रदीप पार्सेकार आनी साईनाथ ह्या पंगडान ही कामगिरी केली.
सुमार देड हजार कील खावपाचे जिन्नस जप्त
अन्न आनी वखदां प्रधिकरणान हें सप्तकभर म्हापश्यां नव्या बस स्टॅण्डाचेर सेगीत तीन खेपे धाड घालून सुमार देड हजार कील वजनाचे खावपाचे जिन्नस जप्त केल्यात. ह्या जिन्नसांचें मोल सुमार 7 लाख 50 हजार रुपया आसूं येता. हातूंत पनीर, धंय, मावा, मसालो, नुस्तें, तळलेलो कांदो आनी हेर वस्तूंचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
