भांगरभूंय | प्रतिनिधी
जेवण आनी वखदां प्रशासनाची कारवाय
म्हापशें, प्रतिनिधी ः हेर राज्यांतले प्रवासी आनी खाजगी माल येरादारी वरवीं जावपी खावपाच्या सामानाची येरादारी आडावपाचे मोहिमे खाला जेवण आनी वखदां प्रशासनान म्हापश्यां बस स्टॅण्डाचेर बिरेस्तारा छापो घातलो. ह्या छाप्यांत सांगली महाराष्ट्र आनी चिकोडी हांगच्यान आयिल्लो सुमार ५०० किलो वजनाचो पनीर जप्त केलो. ह्या पनीराची सुमार देड लाख रूपया किंमत आसा. हाी माल सासश्टी आनी बार्देस म्हालांतल्या दर्यादेग वाठारांतल्या आस्थापनांनी वतालो.
बुधवारा ३ तारखेर जेवण आनी वखदां प्रशासनान मडगांवां कांय आस्थापनांची तपासणी केल्ली. हे तपासणेंत लेबल नाशिल्लें पनीर सांपडिल्लें. ह्या पनिराचो माल शेजारच्या राज्यांतल्यान खाजगी वाहनांतल्यान म्हापश्यां आयलो आनी थंयच्यान ताची पुरवण जाल्ल्याची म्हायती चवकशे वेळार उक्ती जाल्ली. ते प्रमाण बिरेस्तारा ४ तारखेर सकाळीं प्रशासनाच्या अधिकार्यांनी म्हापशें आंतरराज्य बस स्टॅण्डाचेर पाळत दवरली. एक खाजगी मालवाहू रिक्षा टेम्पो येतांच जेवण आनी वखदां प्रशासनाच्या अधिकार्यांनी ह्या टेम्पोची पळोवणी केली. तेन्ना तांकां तातूंत सुमार २०० किलो पनीर सांपडलें. उपरांत प्रशासनान कांय प्रवासी बसींची पळोवणी केली. तेन्ना हे बसींतूय सुमार ३०० किलो पनीर सापडलें. हो सगळो माल अधिकार्यांनी जप्त केलो. उपरांत म्हापशें नगरपालिकेचे मजतीन ह्या सगळ्या मालाचो विलो लायलो.
प्रशासनाचे अधिकारी रिचर्ड नोरोन्हा हांणी, जप्त केल्लो हो पनीर सांगली आनी चिकोडी हांगच्यान आयलो. मडगांवां तपासणे वेळार योग्य म्हायती दिनाशिल्ल्या, लेबल नाशिल्ल्या पनिराचो माल म्हापशेंच्यान आयिल्ल्याची म्हायती मेळिल्ली. ते प्रमाण प्रशासनान ही कारवाय केली. वेवसायीक तशेंच पुरवणदारांनी नेम पाळचे आनी गुणवत्तात्मक मालाची पुरवण जावची, हो हे कारवाये फाटलो हेत आशिल्ल्याचें तांणी सांगलें.
असल्यो गजाली बंद जावपा खातीर दूद तशेंच हेर खावपाच्या मालाची गोंयांत जावपी येरादारीचेर लक्ष दवरचें, अशी आमी महाराष्ट्र आनी कर्नाटकाच्या जेवण आनी वखदां प्राधिकरणा कडेन संपर्क करून मागणी करतले. तशेंच कार्बोचो वेवसाय करपी बस ऑपरेटरांक स्टोरेज वेवस्था करून आनी परवाने घेवनूच हो वेवसाय करपाचो निर्देश दितले, अशें नोरोन्हा हांणी सांगलें.
जेवण आनी वखदां प्रशासनाची संचालक ज्योती सरदेसाय हांच्या मार्गदर्शना खाल अधिकारी रिचर्ड नोरोन्हा, वरिश्ठ अन्न सुरक्षा अधिकारी राजाराम पाटील आनी शैलेश शेणवी, अन्न सुरक्षा अधिकारी प्रितम परब, प्रदीप पार्सेकार आनी साईनाथ ह्या पंगडान हें काम केलें.
सुमार देड हजार किलो वजनाचे खावपाचे जिन्नस जप्त
जेवण आनी वखदां प्रधिकरणान हें सप्तकभर म्हापश्यां नव्या बस स्टॅण्डाचेर सेगीत तीन खेपो छापो घालून सुमार देड हजार किलो वजनाचे खावपाचे जिन्नस जप्त केल्यात. खाद्यपदार्थ जप्त केले. ह्या जिन्नसांची किंमत सुमार ७ लाख ५० हजार रुपया आसूं येता. हातूंत पनीर, धंय, मावा, मसालो, नुस्तें, तळलेलो कांदो आनी हेर वस्तुंचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
