भांगरभूंय | प्रतिनिधी
गोवा कॅनाचो आरोपः जनजागृती खातीर 15 एप्रील मेरेन संस्थे वतीन राज्यभर विशेश मोहीम
भांगरभूंय । प्रतिनिधी
म्हापशें: म्हापशेंच्या कदंब बसस्टण्टा वयल्या प्लॅटफॉर्माचें आनी कर्मचाऱ्यांक विसव घेवपाक आशिल्ल्या कार्यालयाचें दुकानांत रुपांतरीत करून प्रवासी आनी कर्मचाऱ्यांच्या हक्काचेर हावळ हाडल्या. कदंबा येरादारी म्हामंडळान ह्या बसस्टॅण्टाचें मार्केटांत रुपांतरण केल्ले खातीर गोवा कॅनान खर तिडक उक्तायल्या.
मंगळारा म्हापशेंच्या कदंबा बसस्टॅण्डाचेर गोवा कॅन (गोंय नागरी आनी गिरायक कृती नॅटवर्क) हे संस्थेन गिरायक हक्क कागाळ प्रक्रिया आनी गोंयांतल्या प्रवासी गिरायकां खातीर उपलब्ध आशिल्ल्या निवारण यंत्रणेविशीं जनजागृती केली. लोकां मदीं ही जागरुकताय वाडोवचे खातीर 15 एप्रील मेरेन संस्थे वतीन राज्यभर विशेश मोहीम हातांत घेतले.
ह्या बसस्टॅण्डा वयल्या कदंबा चालक आनी वाहकांक विसव घेवचे खातीर एक कूड आशिल्ली. ही कूड बंद करून थंय दुकान थाटलां. ताका लागून कर्मचाऱ्यांनी विसव खंय घेवचो, ते भायर बस गिरायकांच्या प्रवाशी प्लॅटफ़ॉर्माचें रुपांतरण बेकायदो तरेन दुकानांत करून तातूंत च्याचेचें दुकान थाटलां. तें दुकान मातये भरवण करपाचो आदेश आसून लेगीत कदंबा म्हामंडळ आनी म्हापशें पालिका तें मोडपाक वेळ काडटा. प्रवासी गिरायक आनी कदंबा कर्मचाऱ्यांचेर म्हामंडळान हो अन्याय केला, असो आरोप रोलंड मार्टीन्स हांणी केला.
रोलंड मार्टीन्स हांणी सांगलें, गिरायकांक तांच्या अधिकारां विशीं जागरूक करप, हो हे मोहिमेचो उद्देश आसा. सध्या मिठायेच्या दुकानांतल्या ट्रे वा डब्यांचेर एक्सपायरी तारीख वा पदार्थ केन्ना मेरेन खावपाक योग्य आसा, ताची तारीख घालपाचे निर्देश आसात, पूण अजून लेगीत ताची अंमलबजावणी जायना.
बसस्टॅण्डा वयल्या कदंबा म्हामंडळाच्या कंट्रोल रुमांत गिरायकां खातीर कागाळ वही आसा, पूण ताचे वयल्या कागालींची खंयच्याच अधिकारी वर्गा कडल्यान दखल घेनात, अशें दिसलां. अधिकाऱ्यांची सय आशिल्लो एकूय शेरो ते कागाळींचेर नाशिल्लो. तशेंच संबंदीत अधिकाऱ्यांचो फोन नंबर लेगीत नमूद करूंक नाशिल्लो. हे एकंदरीत म्हामंडळाच्या भोंगळ कारभाराचेर मार्टीन्स हांणी तिडक उक्तायली. घरगुती गॅस सिलिंडर आनी हे सेवे वयली विमो येवजण, सिलिंडराची एक्सपायरी, आयएएस मार्क हेल्मेट, सुपरमार्केटांत विकपाक दवरिल्ले पाकीटबंद पदार्थ हे विशीं मार्टीन्स हांणी म्हायती दिली. तशेंच वेळार प्रवासी बस सेवा मेळना वा बशी विशीं कसलीय कागाळ आसल्यार त्यो ग्रामसभेंत मांडच्यो वा येरादारी खात्या कडेन कागाळ करची, अशें तांणी लोकांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
