भांगरभूंय | प्रतिनिधी
पाच जाणां आड खुनी हल्ल्याचो गुन्यांव नोंद
म्हापशें ः दुचाकी वेवस्थीत लाय अशें सांगिल्ल्यान पे-पार्कींग शुल्क घेवपी दोगां कामगारांवर सुरी हल्लो केलो आनी फरारी जाले. चवथीच्या पयल्या दिसाच ही घडणूक म्हापश्यां घडली. फरारी पांच हल्ले करप्यांचो सोद पुलीस घेतात. दुबावितां मदीं कळंगुटेच्या तिगां जाणांचो, जाल्यार सांगोल्डाच्या तिगांचो आसपाव आसा.
ह्या हल्ल्यांत प्रकाश तलवार हो गंभीर जखमी जालो. ताचेर गोमेकॉत उपचार सुरू आसात. जखमीच्या पोटार सुर्यान वार केल्लो. जाल्यार जखमी संदीप कुमार हांचे तकलेर आनी हातार सुरयेन वार केल्यात. उपचारा उपरांत ताका म्हापशें जिल्लो हॉस्पिटलांतलयान डिस्चार्ज दिला.
ह्या प्रकरणांत म्हापशें पुलिसांनी पांचीय दुबावितां आड खून करपाचो यत्न केल्ल्या प्रकरणांत भा.न्या.सं.च्या ३०७ कलमा खाला गुन्यांव नोंद केला.
ही घडणूक बुधवारा सकाळीं ११ वरांचेर घडिल्ली. मरड, म्हापशेच्या रिजीम प्लाझा कॉम्पलेक्सच्या वाठारांतल्या खासगी पे पार्किंगेचे सुवातेर हो प्रकार घडल्लो. हें सगलें कॉम्पलेक्सांतल्या एका दुकानांतल्या सीसीटीव्ही कॅमेर्यांत कैद जालें.
हे घडणुके वेळार दुबावितां मदल्या एकल्यान आपली दुचाकी उबी केली. पे पार्कींग शुल्क आकारणी सेवेचेर तैनात आशिल्लो जखमी संदीप कुमार ह्या कामगारान संबंदीताक गाडी वेवस्थीत पार्क करपाक सांगलें. तेन्ना दुबावितान वाद घालो. दुबावितान संदीपाचे तकलेर गाडयेचे चावयेन वार केलो. उपरांत दुबावितान आपल्या आनीक कांय वांगोड्यांक आपयले. त्या पांचूय दुबावितांनी संदीपाक बरोच बडयलो. संदीपाक मारतात तें पळोवन प्रकाश तलवार हो आपल्या सहकारी कामगाराचे मजतीक धांवून आयलो. तेन्ना दुबावितांनी ताच्या पोटार सुर्यान हल्लो केलो आनी थंयच्यान पळ काडलो.
ह्या हल्ल्यांत जखमी जाल्ल्या दोगांकूय म्हापशें जिल्लो हॉस्पिटलांत दाखल केले. गंभीर जखमी प्रकाश तलवार हाका फुडल्या उपचारा खातीर गोमेकॉत धाडले. थंय ताचेर उपचार सुरु आसात. तर संदीप कुमाराक घरा धाडलो.
म्हापशें पुलिसांक दुबावीतांची वळख पटली. सध्या ते लिपून राविल्ल्यान पुलीस तांचो सोद घेतात. फुडलो तपास पुलीस निरीक्षक निखील पालेकार हांच्या मार्गदर्शना खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
