भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळाचे खाशेले बसकेंत 2023-24 वर्सा खातीर 8 कोटी 60 लाख रुपयांचो शिलकी अर्थसंकलंप मंजूर केलो. ताचेर जाल्ले चर्चे वेळार विरोधी नगरसेवकांनी नगराध्यक्ष आनी मुख्याधिकाऱ्याक कात्रेंत धरपाचो यत्न केलो. अर्थसंकल्पांतल्या कांय तजविटीचेर कांय नगरसेवकांनी आक्षेप घेतिल्ल्यान तातूंत सुदारणा करची पडली.
नगराध्यक्ष प्रिया मिशाळ हिचे येजमानके खाला जाल्ले विशेश बसकेंक उपनगराध्यक्ष विराज फडके, डॉ नूतन बिचोलकार सोडून हेर सगळे नगरसेवक, लेखपाल स्मिता फळदेसाय, पालिका अभियंतो प्रशांत नार्वेकार हाजीर आशिल्ले. अर्थसंकल्पांत सुरवातीची रक्कम 46.80 कोटी रुपया आसा. 2023-24 वर्सा खातीर येणावर 66.06 कोटी रुपये जाल्यार वट्ट खर्च 65.16 कोटी रुपया दाखयला. चर्चे उपरांत 47.66 कोटी रुपयाचें हो अर्थसंकल्प मानून घेतलो.
पाकिकेचो वट्ट अर्थसंकल्प 112.82 रुपयांचो आसा. 2023-24 वर्साचो साबार येणावळ 45.11 कोटी रुपयांची आसा. तातूंत 34.44 कोटी भांडवली (पावत्यो) आनी 5.01 कोटी रुपये सस्पेन्स पावत्यो आसात. मात 2023-24 वर्सा खातीर साबार पेमेन्ट 25.10 कोटी रुपयांच्या भांडवली देयकां सयत आनी 5.01 कोटी रुपयांच्या सस्पेन्स पेमेंटा सयत 40.30 कोटी रुपया आसतलो असो अदमास आसा.
फुडल्या अर्थीक वर्सा खातीर म्हापशें पालिकेन घरां आनी भाडें करांतल्यान 14 कोटी, बेकायदेशीर घरांक घरपट्टी लागू करपाची तजवीज करून 10 लाख रुपये पालिकेचे तिजोरेंत हाडपाचो विचार आसा. उद्देगीक वसाहतींच्या शेडीचेर 8 कोटी कर, घरांतलो आनी मार्केटांतलो कोयर कर, वेपार आनी वेवसाय कर, जायरात सायनबोर्डे, पोस्टर्स, सोपो कर, पे पार्किंग, दुकानां स्टॉल भाडें, बांदकाम शुल्क, बँक व्याज हातूंतल्यान पालिकेचे तिजोरेंत पयशे यतले.
15व्या वित्त आयोगा कडल्यान पालिकेक 5 कोटी रुपयांच्या सरकारी अनुदानाची अपेक्षा आसा. सरकारा कडल्यान शार उदरगत प्रकल्पां खातीर अनुदान म्हणून 5 कोटी आनी रस्त्यार फिरपी गोरवां आनी ल्हान जीव वेवस्थापन अनुदान म्हणून 2 कोटी रुपयांचें विशेश अनुदान अपेक्षीत आसा.
प्रशासकीय कामांत सुदारणा
शारांतल्या कोयर वेवस्थापनांत सुसूत्रताय हाडप, पुनर्मोलवणीचें काम मार्गाक लावप, प्रशासकीय कामांत सुदारण घडोवन हाडप, वाचपघर सुरू करपा वांगडा नवी प्रशासकीय इमारतीचें बांदकाम फुडल्या अर्थीक वर्सा पुराय करप अशीं कामां करपाचे आमचे यत्न आसतले अशें नगराध्यक्ष प्रिया मिशाळ हिणे अर्थसंकल्प सादर करतना सांगलें,
घरपट्टी वाडोवपाक विरोध
कांय नगरसेवकांनी घरपट्टी वाडोवपाक विरोध केलो. नगराध्यक्षान नव्या अर्थीक वर्सांत घरपट्टीच्या माध्यमांतल्यान 14 कोटी रुपया एकठांय करपाची मोख दवोरल्या. हाका ह्या नगरसेवकांनी हरकत घेतली. खंयच्या आदारान हो आंकडो सांगतात. म्हापशेंकारांक वाडीव कर कित्याक अशें सांगून नगरसेवक सुधीर कांदोळकार, अॅड शशांक नार्वेकार, कमल डिसोझा, अन्वी कोरगांवकार, केल ब्रागांझा आनी स्पप्नील शिरोडकारान घरपट्टी वाड करपाक विरोध केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
